Rajkotના લક્ષ્મીનગર અંડરબ્રિજ પાસે યુવકને જાહેરમાં માર મારતો વીડિયો વાયરલ

રાજકોટના લક્ષ્મીનગર અંડરબ્રિજ પાસે એક યુવકને જાહેરમાં માર મારતો વીડિયો સોશિયલ મીડિયા પર વાયરલ થયો હતો. આ ઘટનાએ કાયદો અને વ્યવસ્થાની સ્થિતિ પર ગંભીર સવાલો ઊભા કર્યા હતા. વાયરલ થયેલા વીડિયોમાં સ્પષ્ટપણે જોવા મળ્યું હતું કે કેટલાક લોકો એક યુવકને લાકડીથી ઢોર માર મારી રહ્યા હતા. વીડિયોમાં એવો ઉલ્લેખ પણ કરવામાં આવ્યો હતો કે યુવક દારૂના નશાની હાલતમાં હોવાથી તેને માર મારવામાં આવી રહ્યો છે.

વીડિયો વાયરલ થયા બાદ લોકોમાં ભારે રોષ

જોકે કાયદા મુજબ કોઈ પણ વ્યક્તિને આ રીતે જાહેરમાં સજા કરવાનો અધિકાર નથી. આ વીડિયો વાયરલ થયા બાદ લોકોમાં ભારે રોષ જોવા મળી રહ્યો હતો. આવી રીતે કાયદો હાથમાં લેવાની ઘટના સમાજ માટે ચિંતાજનક છે. પોલીસે આ મામલે સુઓ મોટો લઈને કડક કાર્યવાહી કરવી જોઈએ અને માર મારનારા આરોપીઓને તાત્કાલિક પકડી પાડવા જોઈએ.

માનવ અધિકારોનું ઉલ્લંઘન

આ ઘટના દર્શાવે છે કે સમાજમાં કાયદાનું પાલન કરાવવાને બદલે લોકો જાતે જ સજા આપવા લાગ્યા છે. આવી પ્રવૃત્તિઓ કાયદો અને વ્યવસ્થાની સ્થિતિને વધુ બગાડી શકે છે. નશાની હાલતમાં હોવા છતાં કોઈ પણ વ્યક્તિને જાહેરમાં માર મારવો એ માનવ અધિકારોનું ઉલ્લંઘન કહેવાય. આ મામલે પોલીસની કાર્યવાહી અને ન્યાયતંત્રનો નિર્ણય મહત્વપૂર્ણ રહેશે.