Porbandar News: દરિયાકાંઠે કોસ્ટ ગાર્ડની 'SAREX' કવાયત યોજાઈ

ભારતીય કોસ્ટ ગાર્ડ દ્વારા 25 માર્ચ 2026ના રોજ ગુજરાતના પોરબંદર દરિયાકાંઠે પ્રાદેશિક સર્ચ એન્ડ રેસ્ક્યુ એક્સરસાઇઝ (SAREX)નું સફળતાપૂર્વક આયોજન કરવામાં આવ્યું હતું. આ કવાયતનો મુખ્ય ઉદ્દેશ્ય દરિયાઈ દુર્ઘટનાઓ સમયે વિવિધ એજન્સીઓ વચ્ચે સંકલન અને ઓપરેશનલ સજ્જતા વધારવાનો હતો.

દુર્ઘટનાની મોકડ્રીલ

આ કવાયત દરમિયાન દરિયામાં એક વિમાન ક્રેશ થયું હોય તેવું દ્રશ્ય ઊભું કરવામાં આવ્યું હતું. આ 'માસ સર્ચ એન્ડ રેસ્ક્યુ' ઓપરેશનમાં ત્વરિત પ્રતિસાદ આપવા માટે મરિટાઇમ રેસ્ક્યુ સબ સેન્ટર પોરબંદરને ઇન્સિડન્ટ કમાન્ડ પોસ્ટ બનાવવામાં આવી હતી. મુંબઈ સ્થિત રેસ્ક્યુ કોઓર્ડિનેશન સેન્ટર સાથે મળીને તમામ યુનિટોએ સંકલિત કામગીરી કરી હતી.

વિવિધ એજન્સીઓએ લીધો ભાગ

આ મેગા એક્સરસાઇઝમાં ભારતીય નૌકાદળ, એરપોર્ટ ઓથોરિટી, ગુજરાત મેરિટાઇમ બોર્ડ, મરીન પોલીસ અને મત્સ્યઉદ્યોગ વિભાગ સહિતની એજન્સીઓએ ઉત્સાહપૂર્વક ભાગ લીધો હતો. કોસ્ટ ગાર્ડના જહાજો અને વિમાનોએ દરિયામાં ફસાયેલા લોકોને બચાવવા, પ્રાથમિક સારવાર આપવી અને મેડિકલ ઇવેક્યુએશન (ઘાયલોને ખસેડવા) જેવી કામગીરીનું લાઈવ પ્રદર્શન કર્યું હતું.

આધુનિક ટેકનોલોજીનું પ્રદર્શન

રેસ્ક્યુ ઓપરેશનની સાથે સાથે કોસ્ટ ગાર્ડના જહાજોએ આગ ઓલવવાની ક્ષમતા અને દરિયામાં ફેલાયેલા કાટમાળના વ્યવસ્થાપનનું પણ સફળ નિદર્શન કર્યું હતું. દરિયાઈ તબક્કા બાદ હાર્બર ફેઝમાં એમ્બ્યુલન્સ અને મેડિકલ ટીમો દ્વારા કિનારા પર ઘાયલોની સારવારની પ્રક્રિયા સમજાવવામાં આવી હતી. ઉલ્લેખનીય છે કે, ભારતીય કોસ્ટ ગાર્ડ 4.6 મિલિયન ચોરસ કિમીના વિશાળ દરિયાઈ વિસ્તારમાં સુરક્ષાની જવાબદારી સંભાળે છે.

આ પણ વાંચો - Porbandar News: ભાણવડ અને લાલપુર પંથકમાં કમોસમી વરસાદ, ખેડૂતોના તૈયાર પાકને નુકસાન