Patan News : સિદ્ધપુરમાં કાવડ યાત્રાને ભંગ કરવાનો પ્રયાસ!, માર્ગો પર માંસના અવશેષો ફેંક્યા

પાટણ જિલ્લાના સિદ્ધપુરમાં કાવડ યાત્રાના માર્ગ પર અજાણ્યા શખ્સો દ્વારા માંસના અવશેષો ફેંકવામાં આવતા હિન્દુ સંગઠનો અને સ્થાનિક લોકોમાં ભારે આક્રોશ ફેલાયો છે. આ ઘટના બાદ હિન્દુ સંગઠનો દ્વારા પ્રાંત અધિકારીને આવેદનપત્ર આપીને તાત્કાલિક કાર્યવાહીની માંગણી કરવામાં આવી છે.

મહાદેવ મંદિરના માર્ગો પર માંસના અવશેષો

આ ઘટના સિદ્ધપુરના ધાર્મિક સ્થળો જેવા કે, બ્રહ્મણેશ્વર મહાદેવ, વાલકેશ્વર મહાદેવ અને અરવડેશ્વર મહાદેવના માર્ગ પર બની છે. આ માર્ગો પર કાવડ યાત્રા નીકળતી હોય છે, તેવામાં અજાણ્યા શખ્સો દ્વારા માંસ અને મટનના અવશેષો ફેંકવામાં આવ્યા હતા. આ કૃત્યથી હિન્દુ સમાજની ધાર્મિક લાગણીઓને ઠેસ પહોંચી છે. પોલીસ અને સ્થાનિક તંત્રએ આ મામલે તપાસ શરૂ કરી છે અને ગુનેગારોને ઝડપી પાડવા માટે કાર્યવાહી હાથ ધરી છે. આ ઘટનાથી શહેરમાં તંગદિલીનો માહોલ જોવા મળી રહ્યો છે.

આવેદનપત્ર અને વિરોધ પ્રદર્શન

ઘટનાની જાણ થતાં જ હિન્દુ સંગઠનો કાર્યકરો અને સ્થાનિક નાગરિકો મોટી સંખ્યામાં એકઠા થયા હતા. તેમણે "સિદ્ધપુર નગરપાલિકા હાય હાય" અને "જય શ્રી રામ"ના નારા લગાવીને આ ઘટનાનો વિરોધ કર્યો હતો. સંગઠનો દ્વારા પ્રાંત અધિકારીને આવેદનપત્ર સુપરત કરવામાં આવ્યું છે, જેમાં તાત્કાલિક ધોરણે તાલુકામાં ચાલતી તમામ મટનની લારીઓ અને દુકાનોને બંધ કરવા માટે માંગણી કરવામાં આવી છે. આ ઉપરાંત, ભવિષ્યમાં આવી ઘટનાઓ ન બને તે માટે કડક પગલા ભરવાની પણ અપીલ કરવામાં આવી છે.