Morbi Rain Update: વાંકાનેરમાં ડેમી નદીના પૂરમાં રિક્ષા તણાઈ, પિતાનું મોત અને માસૂમ પુત્ર લાપતા

મોરબી જિલ્લાના વાંકાનેર પંથકમાં વરસાદી આફત વચ્ચે એક અત્યંત હૃદયદ્રાવક દુર્ઘટના સામે આવી છે. કોટડા નાયાણીથી કાગદડી તરફ જવાના માર્ગ પર આવેલી ડેમી નદીમાં પાણીનો પ્રવાહ અત્યંત ઝડપથી વધી રહ્યો હતો. આ દરમિયાન નદી પરથી પસાર થઈ રહેલી એક પેસેન્જર રિક્ષા પાણીના ધસમસતા વહેણમાં અચાનક તણાઈ ગઈ હતી.

35 વર્ષીય પિતાનું ડૂબી જવાથી નીપજ્યું મોત

રિક્ષા પૂરના પાણીમાં ગરકાવ થતાં જ તેમાં સવાર પિતા-પુત્ર તણાવા લાગ્યા હતા. ઘટનાની જાણ થતાં જ આસપાસના ગ્રામજનો અને રેસ્ક્યૂ ટીમ સ્થળ પર દોડી આવ્યા હતા અને બચાવ કામગીરી શરૂ કરી હતી. જોકે, કમનસીબે 35 વર્ષીય પિતા સિરાનભાઈ કટયારનો મૃતદેહ મળી આવ્યો હતો. પિતાના અકાળે થયેલા મોતથી પરિવારમાં અરેરાટી અને ઘેરા શોકની કાલિમા છવાઈ ગઈ છે.

7 વર્ષના માસૂમ પુત્ર કાસિમની શોધખોળ માટે રેસ્ક્યૂ ઓપરેશન

બીજી તરફ, રિક્ષામાં સવાર 7 વર્ષનો માસૂમ પુત્ર કાસિમ કટયાર પાણીના જોરદાર પ્રવાહમાં ગુમ થઈ ગયો છે. તંત્ર અને સ્થાનિક ગોતાખોરો દ્વારા ડેમી નદીના વહેણમાં માસૂમ બાળકની શોધખોળ માટે આક્રમક રીતે રેસ્ક્યૂ ઓપરેશન ચલાવવામાં આવી રહ્યું છે. ઘટનાને પગલે વાંકાનેર વહીવટી તંત્ર દ્વારા નાગરિકોને નદી-નાળાં કે કોઝવે પરથી પસાર ન થવા કડક ચેતવણી આપવામાં આવી છે.

આ પણ વાંચો - 2 August Top News: 2 ઓગસ્ટના રોજ બનનારી મહત્વની ઘટનાઓ