Morbiના વાંકાનેરમાં રાખડી ખરીદવાના બહાને જ્વેલર્સમાંથી રૂ.1.85 લાખની નથડીની ચોરી

મોરબી જિલ્લાના વાંકાનેર શહેરમાં આવેલી એક જ્વેલર્સની દુકાનમાંથી ચોરીની ચોંકાવનારી ઘટના સામે આવી છે. 24 ઓગસ્ટના રોજ બપોરના સુમારે બે મહિલાઓ ગ્રાહકના સ્વાંગમાં દુકાને પહોંચી હતી. તહેવારના માહોલમાં રાખડી ખરીદવાના બહાને આવેલી આ મહિલાઓએ દુકાનદારની નજર ચૂકવીને સોના-ચાંદીના દાગીના સરકાવી લીધા હતા. આ સમગ્ર બનાવ દુકાનમાં લાગેલા સીસીટીવી (CCTV) કેમેરામાં કેદ થઈ ગયો છે, જેના આધારે તપાસનો ધમધમાટ શરૂ કરાયો છે.

નજર ચૂકવીને 65 નંગ બાલીની તસ્કરી

દુકાનદારને ખરીદીના બહાને વાતોમાં પરોવીને આ બંને ચાલાક મહિલાઓએ કીમતી દાગીના પર હાથસાફ કર્યો હતો. તેમણે નજર ચુકવીને કુલ 65 નંગ સોનાની બાલી (નથડી) ચોરી લીધી હતી. ગાયબ થયેલા આ દાગીનાની અંદાજિત કિંમત રૂપિયા 1.85 લાખ હોવાનું જાણવા મળ્યું છે. થોડીવાર બાદ જ્યારે દુકાનદારે સ્ટોકની ચકાસણી કરી ત્યારે ચોરી થઈ હોવાનો ખ્યાલ આવ્યો હતો, ત્યારબાદ સીસીટીવી ફૂટેજ તપાસતા મહિલાઓની કરતૂત છતી થઈ હતી.

વાંકાનેર સીટી પોલીસ મથકે ગુનો નોંધાયો

ચોરીની આ ઘટના અંગે જ્વેલર્સના માલિક દ્વારા વાંકાનેર સીટી પોલીસ મથકે સત્તાવાર બિન-જામીનપાત્ર ગુનાની ફરિયાદ નોંધાવવામાં આવી છે. પોલીસે સીસીટીવી ફૂટેજ કબ્જે લઈને બંને શંકાસ્પદ મહિલાઓની ઓળખ મેળવવા અને તેમને ઝડપી પાડવા માટે અલગ-અલગ દિશામાં તપાસના ચક્રો ગતિમાન કર્યા છે. વેપારીઓમાં જાગૃતિ લાવવા માટે પોલીસે પણ તહેવારોના સમયે દુકાનોમાં વિશેષ સતર્કતા રાખવાની અપીલ કરી છે.

ગુજરાતના વધુ સમાચાર વાંચવા માટે ક્લિક કરો