Mehsanaના વિજાપુરમાં 20 વર્ષના યુવકની કરપીણ હત્યા કરાયેલો મૃતદેહ મળતાં ચકચાર

મહેસાણા જિલ્લાના વિજાપુર તાલુકામાંથી એક હૃદયકંપાવનારો કિસ્સો સામે આવ્યો છે. વિજાપુરના મણિપુરા ગામ પાસે આવેલા 'આરવી હોમ્સ'ની સામે જાહેર જગ્યામાંથી એક અજાણ્યા યુવકની ક્રૂરતાપૂર્વક હત્યા કરાયેલી હાલતમાં લાશ મળી આવતા સમગ્ર પંથકમાં ભારે સનસની ખેડાઈ ગઈ છે. અંદાજે 20 વર્ષની કુમળી વયના આ યુવકનો લોહીલુહાણ દેહ રસ્તા પર પડેલો જોઈને સ્થાનિક રહીશો સ્તબ્ધ થઈ ગયા હતા અને જોતજોતામાં ઘટનાસ્થળે લોકોના મસમોટા ટોળેટોળા ઉમટી પડ્યા હતા.

યુવકની ઓળખ મેળવવા પોલીસના પ્રયાસો

આ અજાણ્યા યુવકની હત્યા પાછળનું અસલી કારણ કે મોટિવ શું હતું, તે હજુ સુધી જાણી શકાયું નથી અને સમગ્ર રહસ્ય હાલ અકબંધ છે. પ્રાથમિક દ્રષ્ટિએ યુવકને કોઈ તીક્ષ્ણ હથિયાર અથવા અન્ય રીતે મોતને ઘાટ ઉતારીને મૃતદેહને અહીં ફેંકી દેવામાં આવી હોવાની આશંકા સેવાઈ રહી છે. મૃતક યુવક કોણ છે અને ક્યાંનો રહેવાસી છે તે અંગેની કોઈ ચોક્કસ માહિતી હજુ સુધી મળી ન હોવાથી, પોલીસ હાલ આસપાસના વિસ્તારોના ગુમ થયેલા યુવકોના રેકોર્ડ ચકાસીને તેની ઓળખ પ્રસ્થાપિત કરવાના પ્રયાસો કરી રહી છે.

વિજાપુર પોલીસનો કાફલો ઘટનાસ્થળે પહોંચ્યો

ઘટનાની ગંભીરતાને ધ્યાનમાં લઈને વિજાપુર પોલીસ સ્ટેશનનો ઉચ્ચ અધિકારીઓ સહિતનો મોટો પોલીસ કાફલો તાત્કાલિક અસરથી મણિપુરા ગામે દોડી આવ્યો હતો. પોલીસે ઘટનાસ્થળની આસપાસના વિસ્તારને કોર્ડન કરીને એફએસએલ (FSL) અને ડોગ સ્કવોડની મદદથી કડીઓ મેળવવાની તજવીજ શરૂ કરી છે. આ હિંસક ગુનાના માસ્ટરમાઇન્ડ અને હત્યારાઓને ઝડપી પાડવા માટે પોલીસે આસપાસના સીસીટીવી (CCTV) ફૂટેજ ખંખોળવાની સાથે અલગ-અલગ ટીમો બનાવીને તપાસના ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો