Limbdi: તાલુકાના રાણાગઢમાંથી જિલ્લા SOGએ મુન્નાભાઈ MBBSને દબોચ્યો

સુરેન્દ્રનગર એસઓજી ટીમને લીંબડી તાલુકાના રાણાગઢ ગામે એક શખ્સ ડોકટર ન હોવા છતાં છેલ્લા પાંચ વર્ષથી પ્રેકટીસ કરતો હોવાની બાતમી મળતા રેડ કરાઈ હતી. જેમાં મુળ અમદાવાદના શખ્સને ઝડપી લઈ પાણશીણા પોલીસમાં ગુનો દાખલ કરાયો છે.

વધુમાં મળતી માહિતી મુજબ સુરેન્દ્રનગર એસઓજી પીઆઈ બી.એચ.શીંગરખીયાની સુચનાથી પેટ્રોલિંગ કરી રહેલા સ્ટાફને લીંબડી તાલુકાના રાણાગઢ ગામે એક શખ્સ ડોકટર ન હોવા છતાં તબીબી પ્રેકટીસ કરતો હોવાની બાતમી મળી હતી. આથી લીંબડી તાલુકાના નાની કઠેચી PHCના મેડીકલ ઓફીસર ડો. હાર્દીક રાઠોડને સાથે રાખી રેડ કરી હતી. જેમાં મુળ અમદાવાદના મટોડામાં આવેલ સુથારવાસમાં રહેતા 55 વર્ષીય હિંમત ભાવુભાઈ નાયક ઝડપાયો હતો. આ શખ્સની પુછપરછ કરતા તેની પાસે તબીબી સારવાર કરવાનું કોઈ પ્રમાણપત્ર કે ડીગ્રી અને ગુજરાત મેડીકલ કાઉન્સીલનું પ્રમાણપત્ર હતુ નહી. તે પાંચ વર્ષથી તબીબી સારવાર કરતો હોવાનું પણ સામે આવ્યુ હતુ. આથી પોલીસે રૂ.16,578ની દવાઓ સાથે આ શખ્સને ઝડપી લઈને પાણશીણા તાલુકા પોલીસ મથકે ગુનો નોંધાવ્યો છે. બનાવની વધુ તપાસ હાથ ધરાઈ છે.