Jamnagarમાં વનતારાના યજમાનપદે EARAZA વાર્ષિક કોન્ફરન્સ-2026નો પ્રારંભ: 30 દેશોના નિષ્ણાતો એક મંચ પર ઉપસ્થિત!

જામનગરમાં વનતારાના યજમાનપદે 'યુરેશિયન રિજનલ એસોસિએશન ઓફ ઝૂ એન્ડ એક્વેરિયમ્સ' (EARAZA)ની વાર્ષિક કોન્ફરન્સ-2026નો ભવ્ય પ્રારંભ થયો છે. 26થી 29 ઓક્ટોબર દરમિયાન યોજાયેલી આ કોન્ફરન્સમાં 30 દેશોની 98 સંસ્થાઓ અને ભારતની 29 ઝૂઓલોજિકલ સંસ્થાના અગ્રણીઓ, વેટરનરી ડૉક્ટર્સ, વૈજ્ઞાનિકો તથા વન્યજીવ સંરક્ષકો એક મંચ પર એકત્રિત થયા છે.

વનતારાના સીઈઓ વિવાન કરાણીની જાહેરાત 

"વન્યજીવ સંરક્ષણ માટે વૈશ્વિક ભાગીદારીના સુદ્રઢીકરણ" થીમ પર આધારિત આ સંમેલનનો ઉદ્ઘાટન સમારોહ ત્રણ વખતના ગ્રેમી એવોર્ડ વિજેતા સંગીતકાર રિકી કેજની સંગીતમય પ્રસ્તુતિ સાથે દીપપ્રાગટ્ય કરીને કરવામાં આવ્યો હતો. આ અવસરે વનતારાના સીઈઓ વિવાન કરાણીએ તમામ EARAZA સભ્યોને એક વર્ષ માટે સુરક્ષિત ક્લાઉડ પ્લેટફોર્મ 'ANTZ સોફ્ટવેર' વિનામૂલ્યે આપવાની જાહેરાત કરી હતી.

વૈશ્વિક સંરક્ષણ અને આધુનિક ટેકનોલોજીનું પ્રદર્શન

આ ચાર દિવસીય પરિષદમાં સરહદોને વિસરાવીને સહિયારા જ્ઞાન, ડેટા અને પશુ કલ્યાણના ધોરણો સુધારવા પર વિશેષ મંથન ચાલી રહ્યું છે. રશિયાના જંગલોથી લઈને આર્ક્ટિક સુધીના અમુર વાઘ, ઓરિએન્ટલ સ્ટોર્ક જેવા જીવોના સંરક્ષણ કાર્યક્રમોની ચર્ચા સાથે જ પ્રદર્શન ક્ષેત્રમાં સાત દેશોના 13 પ્રદર્શકો દ્વારા અત્યાધુનિક સાધનો રજૂ કરવામાં આવ્યા છે. વનતારાના પેવેલિયનમાં 'વેસ્પર' એજ-AI બાયોએકોસ્ટિક મોનિટર, સ્માર્ટ એગ એનાલિસિસ અને બેલ્ટ-વોર્ન NFC ડિવાઇસ જેવા આધુનિક ટેકનોલોજી ટૂલ્સ મુખ્ય આકર્ષણનું કેન્દ્ર બન્યા છે, જે વન્યજીવ સંભાળ ક્ષેત્રે ક્રાંતિકારી સાબિત થશે.જીવનભરની સેવાનું સન્માન અને સમાપન સમારોહ

કોન્ફરન્સના અંતિમ દિવસે 'ઇન્ડિયન ઝુ યર બુક' 2026નું વિમોચન કરવામાં આવશે તેમજ વન્યજીવ સંરક્ષણમાં ઉત્કૃષ્ટ યોગદાન આપનાર મોસ્કો ઝૂના સુશ્રી સ્વેત્લાના અકુલોવા, ચેક રિપબ્લિકના રેને ફ્રેનેક, બાકુ ઝૂના અઝેર હુસેનોવ તેમજ ભારતના એસ. સી. શર્મા, ડૉ. ડી. એન. સિંહ અને બી. એસ. બોનાલ સહિતના છ મહાનુભાવોને 'લાઇફટાઇમ અચીવમેન્ટ એવોર્ડ' એનાયત કરવામાં આવશે. સાંજે વર્ષ 2027ના યજમાનને EARAZAનો ધ્વજ સોંપવાની વિધિ સાથે આ વૈશ્વિક મહાસંમેલનનું સફળ સમાપન થશે, જે વન્યજીવ સંરક્ષણના ક્ષેત્રમાં એક નવો અધ્યાય રચશે.

ગુજરાતના વધુ સમાચાર વાંચવા માટે ક્લિક કરો