Gujaratમાં શિક્ષણનું સ્તર ઘટ્યું: 'પરખ' રિપોર્ટમાં ગુજરાત ટોપ-10માંથી બહાર, લો-પરફોર્મિંગ સ્ટેટ્સમાં મળ્યું સ્થાન

ભારત સરકારના શિક્ષણ વિભાગ દ્વારા રજૂ કરાયેલા 'પરખ' (PARAKH) રાષ્ટ્રીય સર્વેક્ષણ 2024ના રિપોર્ટમાં ગુજરાતના શિક્ષણ સ્તરને લઈને ચોંકાવનારો ખુલાસો થયો છે. આ રિપોર્ટ મુજબ ગુજરાતનું શિક્ષણનું સ્તર અપેક્ષા કરતાં નબળું જોવા મળ્યું છે. સર્વેક્ષણના તારણો અનુસાર સર્વશ્રેષ્ઠ પ્રદર્શન કરનારા (ટોપ-10 પરફોર્મિંગ સ્ટેટ્સ)ની યાદીમાં ગુજરાત રાજ્યનો સમાવેશ થઈ શક્યો નથી. તેનાથી વિપરીત ગુજરાતનો સમાવેશ ઓછું પ્રદર્શન કરનારા (લો-પરફોર્મિંગ) 10 રાજ્યોની યાદીમાં થયો છે.

ભારત સરકારના શિક્ષણ વિભાગના રિપોર્ટમાં ખુલાસો

જે રાજ્યના શિક્ષણ વિભાગ માટે ચિંતાનો વિષય છે. રિપોર્ટમાં માત્ર રાજ્યનું સ્તર જ નહીં પરંતુ જિલ્લાવાર પ્રદર્શનની પણ સમીક્ષા કરવામાં આવી છે. દેશના સૌથી ઓછું પ્રદર્શન કરનારા 50 જિલ્લાઓની યાદીમાં ગુજરાતના અનેક જિલ્લાઓનો સમાવેશ થયો છે, જેમાં જામનગર જિલ્લાને 21મો ક્રમ આપવામાં આવ્યો છે. ગીર સોમનાથ 28માં ક્રમે છે. ખેડા જિલ્લો 44માં ક્રમે છે. છોટાઉદેપુર 47માં ક્રમે છે. પોરબંદર જિલ્લો 48માં ક્રમે આવે છે.

દેશના 50 લો પરફોર્મિંગમાં ગુજરાતના 5 જિલ્લાઓ

આ જિલ્લાઓનું શિક્ષણ ક્ષેત્રે નીચું પ્રદર્શન દર્શાવે છે કે રાજ્યના અંતરિયાળ અને અન્ય વિસ્તારોમાં શિક્ષણની ગુણવત્તા અને માળખાકીય સુવિધાઓમાં તાત્કાલિક સુધારાની જરૂર છે. શિક્ષણ વિભાગના જ આ રિપોર્ટથી રાજ્ય સરકારના ગુણોત્સવ અને અન્ય શૈક્ષણિક કાર્યક્રમોના દાવાઓ સામે ગંભીર પ્રશ્નાર્થ ઊભા થયા છે. નિષ્ણાતો માની રહ્યા છે કે આ રિપોર્ટ રાજ્ય સરકારને શિક્ષણના સ્તરમાં સુધારો કરવા માટે નક્કર પગલાં લેવાની દિશામાં ધ્યાન કેન્દ્રિત કરવા માટે જરૂરી છે.