Gujarat weather: રાજ્યમાં બે વરસાદી સિસ્ટમ સક્રિય થઈ, આ વિસ્તારોમાં સામાન્યથી મધ્યમ વરસાદની આગાહી

હાલમાં રાજ્યમાં સાયક્લોનિક સરક્યુલેશન અને વેસ્ટર્ન ડિસ્ટર્બન્સ એમ બે મજબૂત સિસ્ટમ સક્રિય થવાના કારણે હવામાન વિભાગ દ્વારા આગામી દિવસોમાં સામાન્યથી મધ્યમ વરસાદની આગાહી કરવામાં આવી છે.આ નવી સિસ્ટમ સક્રિય થતાં જ રાજ્યમાં મેઘરાજાએ ધમાકેદાર ઇનિંગ શરૂ કરી દીધી છે અને છેલ્લા 24 કલાક દરમિયાન રાજ્યના 95 તાલુકાઓમાં નોંધપાત્ર વરસાદ નોંધાયો છે.હવામાન વિભાગના જણાવ્યા અનુસાર આગામી દિવસોમાં સાર્વત્રિક વરસાદી માહોલ રહેશે પરંતુ ભારે કે અતિભારે વરસાદ પડે તેવી શક્યતા હાલ નહિવત સેવાઈ રહી છે.

24 કલાકમાં દક્ષિણ ગુજરાતમાં સારો વરસાદ નોંધાયો

છેલ્લા 24 કલાકમાં દક્ષિણ ગુજરાતમાં મેઘરાજાની સૌથી વધુ મહેર જોવા મળી છે.જેમાં તાપીના વાલોડ, વલસાડના ઉમરગામ તેમજ વ્યારા અને ઉકાઈ પંથકમાં સૌથી વધુ 2.5 ઈંચ વરસાદ ખાબક્યો છે. આ ઉપરાંત સુરત શહેરમાં પણ મેઘરાજાએ સરેરાશ 2 ઈંચ જેટલી હાજરી પુરાવી છે.જ્યારે વલસાડના નાનાપૌંડા અને નવસારીના ચીખલીમાં 1.5 ઈંચ તેમજ નવસારી શહેરમાં 1 ઈંચ વરસાદ નોંધાયો છે.આ મુખ્ય વિસ્તારો ઉપરાંત રાજ્યના અન્ય 88 તાલુકાઓમાં પણ ધીમી ધારે નોંધપાત્ર વરસાદી ઝાપટાં પડ્યા છે.

રાજ્યમાં હજુ પણ 31 ટકા વરસાદની ઘટ 

આગામી દિવસોની આગાહી મુજબ, સક્રિય થયેલી આ સિસ્ટમની અસર હેઠળ ઉત્તર અને મધ્ય ગુજરાતમાં પણ સારી એવી મેઘમહેર થવાની સંભાવના છે.આ સાથે જ સૌરાષ્ટ્ર અને દક્ષિણ ગુજરાતના વિવિધ ભાગોમાં વરસાદી માહોલ જળવાઈ રહેશે, જ્યારે અમદાવાદ શહેરમાં પણ છુટાછવાયા વરસાદની પુરેપુરી સંભાવના છે. નોંધનીય છે કે ચાલુ ચોમાસાની સીઝનમાં રાજ્યમાં હજુ પણ 31 ટકા વરસાદની ઘટ વર્તાઈ રહી છે.તેવામાં નવેસરથી શરૂ થયેલો આ વરસાદી રાઉન્ડ ઓછી વરસાદી ઘટને પુરી કરવામાં ખેડૂતો અને નાગરિકો માટે ખૂબ જ રાહતરૂપ સાબિત થશે.

આ પણ વાંચોઃ Himatnagar: સાબરકાંઠા ખાસ લોક અદાલત યોજાઇ, 405 કેસોનો નિકાલ