Gujarat Weather : રાજયમાં ગરમીની થઈ શરૂઆત, શિયાળો લઈ રહ્યો છે વિદાય

રાજ્યમાં શિયાળાની વિદાયની શરૂઆત થઈ છે,લઘુત્તમ તાપમાનમાં 3 થી 5 ડિગ્રીનો વધારો થયો છે,બપોરે ગરમીનો પારો 34થી 35 ડિગ્રીની આસપાસ રહી શકે છે.રાજયમાં ઉત્તર પૂર્વથી ઉત્તર તરફના પવન ફુકાતા ગરમીનો અહેસાસ થઈ રહ્યો છે,રાજયમાં પવનોની દિશા પણ બદલાઈ છે જેના કારણે ઠંડી ધીરે ધીરે વિદાય લઈ રહી છે.

જાણો કયા કેટલું તાપમાન નોંધાયું

હવામાન વિભાગની આગાહી પ્રમાણે વાત કરવામાં આવે તો નલિયામાં 16.4 ડિગ્રી, ડીસામાં 18.4 ડિગ્રી,અમદાવાદમાં 21.2, ગાંધીનગરમાં 20.3 ડિગ્રી,વડોદરામાં 19.2 ડિગ્રી, સુરતમાં 21.2 ડિગ્રી,ભાવનગરમાં 22.4 ડિગ્રી, જૂનાગઢમાં 21.7 ડિગ્રી,કંડલામાં 22.3 ડિગ્રી, ભુજમાં 21.5 ડિગ્રી,કેશોદમાં 15.3 ડિગ્રી, પોરબંદરમાં 15.5 ડિગ્રી તાપમાન નોંધાયું છે.

બપોરના સમયે ગરમીનો અહેસાસ

ગુજરાતમાં ઠંડી ધીરે ધીરે વિદાય લઈ શકે છે તેવી આગાહી હવામાન વિભાગ દ્વારા કરવામાં આવી છે. બંગાળની ખાડી તરફથી આવતા ભેજવાળા પવન અને વેસ્ટર્ન ડિસ્ટર્બન્સને કારણે રાજ્યના અનેક વિસ્તારોમાં વાદળછાયું વાતાવરણ છવાયું છે.આ સાથે ગરમી વધવાની પણ આગાહી કરી છે.હાલ ગુજરાતમાં ઉત્તરથી ઉત્તર પૂર્વની દિશાના પવન ફૂંકાઈ રહ્યા છે. ત્યારે ગુજરાતમાં 24 કલાક શુષ્ક હવામાન રહેશે.

રાજ્યમાં એક જ દિવસમાં તાપમાન 2 થી 5 ડિગ્રી વધી ગયું છે

પવનની દિશા બદલાતા તાપમાનમાં વધારો થયો છે. જમ્મૂ-કાશ્મીરમાં નવું વેસ્ટર્ન ડિસ્ટર્બન્સ સક્રિય થતા ગુજરાત પર તેની મોટી અસર જોવા મળી છે. અમદાવાદના લઘુત્તમ તાપમાનમાં એક દિવસમાં 3.5 ડિગ્રીનો વધારો થયો છે. વહેલી સવારે લાગતી ઠંડીના પ્રમાણમાં ઘટાડો થયો છે. પરંતું ત્રણ દિવસ બાદ ફરી ઠંડીમાં સામાન્ય વધારો થઈ શકે છે. જો કે, હાલના દિવસોમાં મિશ્ર ઋતુ રહેતી હોવાના કારણે રોગચાળાના પ્રમાણમાં વધારો થયો છે. સવારે અને રાત્રે ઠંડી તો દિવસના ભાગમાં ગરમીનો અનુભવ થઈ રહ્યો છે.