Gujarat News: રાજ્યના દરિયાકાંઠે ક્યાંથી તણાઈને આવી રહ્યાં છે કન્ટેનર, આજે દ્વારકા અને સુત્રાપાડામાં જોવા મળ્યા

ગુજરાતના દરિયા કાંઠે છેલ્લા એક મહિનામાં કન્ટેનર તણાઈને આવ્યા હોવાની ઘટનાઓ સામે આવી છે. કચ્છ, સૌરાષ્ટ્ર અને દક્ષિણ ગુજરાતના દરિયા કિનારે આ પ્રકારના કન્ટેનર તણાઈને આવ્યા હોવાના બનાવા સામે આવ્યા છે. આજે દ્વારકા અને જૂનાગઢના ચોરવાડના દરિયાકાંઠે પણ એક કન્ટેનર તણાઈને આવતુ દેખાયું હતું. આ કન્ટેનર બાબતે પોલીસે કોસ્ટગાર્ડ અને કસ્ટમ વિભાગને જાણ કરી તેની વધુ તપાસ હાથ ધરી છે.

દ્વારકા અને ચોરવાડના દરિયાકાંઠે કન્ટેનર તણાઈને આવ્યું

પ્રાપ્ત વિગતો પ્રમાણે ગુજરાતના દરિયાકાંઠે બિનવારસી કન્ટેનર તણાઈને આવ્યા હોવાની અનેક ઘટનાઓ સામે આવી છે. આજે સુત્રાપાડાના ધામળેજના દરિયામાં એક કિ.મી દૂર કન્ટેનર જોવા મળ્યું હતું. અહીં દોઢ મહિના પહેલા પણ કન્ટેનર તણાઈને આવ્યું હતું. આ ઉપરાંત જૂનાગઢના ચોરવાડ નજીક જુજારપુર પાસેના દરિયામાં પણ કન્ટેનર જોવા મળ્યું હતું. જ્યારે દેવભૂમિ દ્વારકામાં વધુ બે કન્ટેનર તણાઈને આવ્યા હોવાની ઘટના સામે આવી છે. દ્વારકામાં રૂપેણ બંદર અને સમિયાણી ટાપુ પર બિનવારસી કન્ટેનર તણાઈને આવ્યાં છે.

કચ્છના દરિયાકાંઠે બિનવારસી કન્ટેનર મળી આવ્યું હતું

ગત 21 ઓગસ્ટે કચ્છના દરિયાકાંઠે બિનવારસી કન્ટેનર મળી આવ્યું હતું. કચ્છમાં અલગ અલગ દરિયાકાંઠેથી વધુ ત્રણ કન્ટેનર તણાઈને આવ્યા હતાં. જેમાં પાંચોટીયા અને ધોળુપીર, કડુલી પાસેથી કન્ટેનર મળ્યા હતાં. આમ કન્ટેનર મળવાની ઘટનાઓથી મરીન પોલીસ, કસ્ટમ વિભાગ અને કોસ્ટગાર્ડ એલર્ટ થઈ ગયાં છે. આ કન્ટેનર ક્યાંથી તણાઈને આવ્યાં છે તેની વધુ તપાસ હાથ ધરવામાં આવી છે. આ કન્ટેનર કેમિકલ ભરેલું હોવાનું અનુમાન લગાવાઈ રહ્યું છે.