Godhra:ભૂંસાની બોરીની આડમાં લઈ જવાતો વિદેશી દારૂનો જંગી જથ્થો ઝડપાયો

ઘોંઘબા તાલુકાના સીમલીયા ગામે કરોલી ફાટક ત્રણ રસ્તા ઉપર ગોધરા LCB પોલીસે નાકાબંધી કરી ટ્રકમાં ભુસાની આડમાં લઈ જવાતો રૂા.36,84,606 નો વિદેશી દારૂ અને બીયરના જથ્થા સહિત કુલ રૂા.46,96,606ના મુદામાલ ઝડપી પાડયો હતો, જ્યારે ડ્રાઈવર અને ક્લિનર ફરાર થઈ ગયા હતાં.

પંચમહાલ જિલ્લાના ઉચ્ચ પોલીસ અધિકારીઓ દ્વારા એલસીબી પીઆઇ એન.એલ.દેસાઈ અને એલ.સી.બી. સ્ટાફ્ના અધિકારી તથા કર્મચારી ઓને પ્રોહીબીશન ની હેરાફેરી કરતા ઇસમો ઉપર વોચ રાખી રેઈડ કરવા સુચના આપવામાં આવી હતી. જે અન્વયે એલસીબી ટીમ પેટ્રોલીંગમાં હતી, તે દરમિયાન એલસીબી પોલીસને આઈશર ટ્રકમાં ભૂસાની બોરીઓની આડમાં બિયર અને વિદેશી દારૂની મોટાપાયે હેરાફેરી કરાતી હોવાની બાતમી મળતાં એલસીબી પોલીસે ઘોઘંબાના સીમલિયા કરોલી ત્રણ રસ્તા પાસે વોચ ગોઠવી નાકાબંધી કરી હતી. દરમિયાન એક આઈશર ટ્રક ત્યાંથી પસાર થતાં તેને ઊભી રખાવી તલાશી લેતાં તેમાંથી ભૂસાની બોરીઓની આડમાં વિદેશી દારૂની હેરાફેરી કરાતી હોવાનું જોવા મળ્યું હતું. પોલીસે કુલ રૂા.36,84,606 નો વિદેશી દારૂનો જથ્થો તેમજ ટ્રક મળી કુલ રૂા.46,96,606નો મુદામાલ જપ્ત કર્યો હતો. એલસીબી પોલીસને બાતમી મળી હતી કે આ દારૂનો જથ્થો ઘોઘંબાના શેરપુરાના દિલીપસિહ ઉર્ફે ગનું બળવંતસિહ પરમાર તથા ગુણેસીયાના અરવિંદસિહ સોમસિંગ જાદવે મંગાવ્યો હતો, જેના આધારે પોલીસે બંને સામે દામાવાવ પોલીસ મથકે ગુનો દાખલ કરી આગળની કાર્યવાહી હાથ ધરી ધરપકડના ચક્રો ગતિમાન કર્યા છે.