Godhraના પોલીસ પરેડ ગ્રાઉન્ડ ખાતે યોગ અને ધ્યાન શિબિર યોજાઈ, રાજ્ય યોગ બોર્ડના ચેરમેન શિશુપાલ રહ્યા ઉપસ્થિત

પંચમહાલ જિલ્લાના ગોધરા શહેર સ્થિત પોલીસ પરેડ ગ્રાઉન્ડ ખાતે એક ભવ્ય યોગ અને ધ્યાન શિબિરનું આયોજન કરવામાં આવ્યું હતું. શારીરિક અને માનસિક સ્વાસ્થ્યને ઉત્તમ બનાવવાના ઉદ્દેશ્યથી યોજાયેલા આ પ્રોત્સાહક કાર્યક્રમમાં ગુજરાત રાજ્ય યોગ બોર્ડના ચેરમેન શિશુપાલ ખાસ ઉપસ્થિત રહ્યા હતા. આ શિબિરમાં ગોધરા અને આસપાસના વિસ્તારમાંથી મોટી સંખ્યામાં નગરજનો, યુવાનો અને સ્થાનિક આગેવાનોએ પણ ઉત્સાહભેર ભાગ લીધો હતો, જેનાથી સમગ્ર પોલીસ પરેડ ગ્રાઉન્ડ પર પરમ શાંતિ અને યોગમય વાતાવરણ સર્જાયું હતું.

પદાધિકારીઓ અને ઉચ્ચ અધિકારીઓએ એકસાથે કર્યા યોગાભ્યાસ

આ યોગ અને ધ્યાન શિબિરમાં રાજકીય પદાધિકારીઓ તથા જિલ્લા વહીવટી તંત્રના ઉચ્ચ અધિકારીઓ પણ સહભાગી થયા હતા. પંચમહાલ જિલ્લા ભાજપ પ્રમુખ મયંકભાઈ દેસાઈ, જિલ્લા ભાજપ પ્રભારી હર્ષદ વસાવા, ધારાસભ્ય જયદ્રથસિંહ પરમાર, ધારાસભ્ય નિમિષાબેન સુથાર અને જિલ્લા પંચાયત પ્રમુખ નીરજ પટેલ સહિત જિલ્લા કલેક્ટર તેમજ જિલ્લા વિકાસ અધિકારી (DDO) પણ શિબિરમાં હાજર રહ્યા હતા. તમામ મહાનુભાવો અને અધિકારીઓએ સામાન્ય નાગરિકો સાથે એકસાથે બેસીને વિવિધ યોગાસનો, પ્રાણાયામ અને ધ્યાનનો અભ્યાસ કર્યો હતો.

"સ્વસ્થ જીવન અને દેશના ઉજ્જવળ ભવિષ્ય માટે યોગ જરૂરી" - શિશુપાલ

કાર્યક્રમ દરમિયાન ગુજરાત રાજ્ય યોગ બોર્ડના ચેરમેન શિશુપાલએ ઉપસ્થિત સહુને સંબોધિત કરતા યોગનું મહત્વ સમજાવ્યું હતું. તેમણે જણાવ્યું હતું કે યોગ માત્ર શારીરિક કસરત નથી પરંતુ નિરોગી અને તંદુરસ્ત જીવન જીવવાની એક સુંદર ચાવી છે. દરેક નાગરિકે પોતાના રોજિંદા જીવનમાં યોગને વણી લેવો જોઈએ. તેમણે વધુમાં ઉમેર્યું કે દેશના ઉજ્જવળ ભવિષ્ય અને સશક્ત રાષ્ટ્રના નિર્માણ માટે દરેક નાગરિક માનસિક અને શારીરિક રીતે સ્વસ્થ રહે તે અત્યંત જરૂરી છે, જે માત્ર નિયમિત યોગ અને ધ્યાનથી જ શક્ય બની શકે છે.

ગુજરાતના વધુ સમાચાર વાંચવા માટે ક્લિક કરો