Dang News: વઘઈ પોલીસે કુડકસ ગામેથી ગેરકાયદેસર દેશી બંદૂક સાથે એક ઈસમને ઝડપી પાડ્યો

ડાંગ જિલ્લામાં ગેરકાયદેસર હથિયારો રાખનારા તત્વો સામે પોલીસે ઝુંબેશ તેજ કરી છે. વઘઈ પોલીસની ટીમે બાતમીના આધારે કુડકસ ગામમાં રેડ કરીને એક શખ્સને લાયસન્સ વગરની દેશી હાથ બનાવટની બંદૂક સાથે ઝડપી લીધો છે. પોલીસે હથિયાર જપ્ત કરી આરોપી વિરૂદ્ધ કાયદેસરની તપાસ હાથ ધરી છે.

બાતમીના આધારે પોલીસની રેડ

વઘઈ પોલીસ સ્ટેશનના સ્ટાફને ખાનગી બાતમી મળી હતી કે, કુડકસ ગામમાં રહેતો એક ઈસમે પોતાના ઘરમાં ગેરકાયદેસર હથિયાર છુપાવ્યું છે. આ બાતમીના આધારે પોલીસે કુડકસ ગામના રહેવાસી ઇશ્વરભાઈ બહાદુરભાઈ ગાવિતના રહેણાંક મકાનમાં તપાસ હાથ ધરી હતી. પોલીસની તપાસ દરમિયાન ઘરના એક ખૂણે છુપાવેલી દેશી હાથ બનાવટની બંદૂક મળી આવી હતી.

લાયસન્સ વગર રાખ્યું હતું હથિયાર

પોલીસે જ્યારે ઇશ્વરભાઈ પાસે બંદૂક રાખવા અંગેના સત્તાવાર લાયસન્સ અથવા પરમિટની માંગણી કરી, ત્યારે તેમની પાસે કોઈ પણ માન્ય દસ્તાવેજ મળી આવ્યા ન હતા. કાયદેસરની પરવાનગી વગર જીવલેણ હથિયાર રાખવું એ ગુનો હોવાથી પોલીસે તાત્કાલિક અસરથી બંદૂક કબજે કરી આરોપીની અટકાયત કરી હતી.

હથિયાર ધારા હેઠળ ગુનો દાખલ

વઘઈ પોલીસે આ મામલે ગંભીરતા દાખવી આરોપી ઇશ્વરભાઈ ગાવિત વિરૂદ્ધ હથિયાર ધારા (Arms Act) ની કલમ 25(1)(A) હેઠળ ગુનો દાખલ કર્યો છે. પોલીસ હવે એ દિશામાં તપાસ કરી રહી છે કે, આરોપીએ આ બંદૂક ક્યાંથી અને કોની પાસેથી મેળવી હતી, તેમજ તેનો ઉપયોગ કોઈ ગુનાહિત પ્રવૃત્તિમાં કરવાનો હતો કે કેમ.

ડાંગ જેવા વનરાજી ધરાવતા વિસ્તારમાં ગેરકાયદેસર હથિયારોનો દૂષણ ડામવા માટે પોલીસની આ કામગીરીને સ્થાનિકોએ બિરદાવી છે.

આ પણ વાંચો - Dang News: આહવા-બોરખેત રોડ પર કાર અને બાઈક વચ્ચે ગમખ્વાર અકસ્માત, બે યુવાનોના મોત