Dangમાં સંભવિત 'શક્તિ' વાવાઝોડાની અસર હેઠળ સાપુતારા ખાતે વરસાદ શરૂ, ખેડૂતો થયા ચિંતિત

અરબી સમુદ્રમાં સર્જાયેલા સંભવિત 'શક્તિ' વાવાઝોડાની અસર હવે ડાંગ જિલ્લાના વાતાવરણ પર જોવા મળી રહી છે. ગિરિમથક સાપુતારા ખાતે વરસાદની શરૂઆત થઈ છે. જેના પગલે પ્રવાસીઓમાં ખુશીનો માહોલ છે. પરંતુ તળેટી વિસ્તારમાં આ અકાળે વરસાદને કારણે ખેડૂતોમાં ચિંતા વ્યાપી ગઈ છે. ગુજરાતના એકમાત્ર હિલ સ્ટેશન સાપુતારા ખાતે વરસાદ પડવાથી વાતાવરણમાં ઠંડક પ્રસરી ગઈ છે. પ્રવાસીઓ માટે આ વરસાદ એક ખુશનુમા અનુભવ લઈને આવ્યો છે અને વરસાદી માહોલને માણવા માટે વધુ પ્રવાસીઓ ઉમટી પડે તેવી શક્યતા છે.

ગિરિમથક સાપુતારા ખાતે શરૂ થયો વરસાદ

જ્યાં એક તરફ સાપુતારામાં પ્રવાસીઓ ખુશ છે ત્યાં બીજી તરફ ડાંગના તળેટી વિસ્તારમાં ખેતી કરતાં ખેડૂતોની હાલત કફોડી બની છે. આ અણધાર્યા વરસાદથી ખેતરોમાં ઊભેલા પાકને મોટું નુકસાન થવાની ભીતિ છે. ખાસ કરીને ડાંગ જિલ્લાના મુખ્ય પાકો જેવા કે ડાંગર, નાગલી અને વરાઈ જેવા પાકને ભારે નુકસાન પહોંચી શકે છે.

તળેટી વિસ્તારમાં વરસાદ પડતા ખેડૂતોમાં ચિંતા

જો વરસાદ લંબાય તો ખેડૂતોને મોટું આર્થિક નુકસાન થવાની સંભાવના છે. કારણ કે આ પાકો હાલ લણણીના આરે છે. હવામાન વિભાગે સંભવિત વાવાઝોડાને લઈને જે આગાહી કરી છે તેના કારણે તંત્ર પણ એલર્ટ મોડ પર છે. ખેડૂતોએ માવઠાથી પાકને બચાવવા માટે તાત્કાલિક પગલાં લેવા પડે તેવી સ્થિતિ સર્જાઈ છે.