Daman પોલીસ તોડકાંડ; ખંડણીખોર પોલીસકર્મીઓની જામીન અરજી કોર્ટે ફગાવી

સંઘ પ્રદેશ દમણમાં બારડોલીના પર્યટકો પાસેથી ખંડણી ઉઘરાવવાના બહુચર્ચિત પોલીસ તોડકાંડ મામલે મોટા સમાચાર સામે આવ્યા છે. આ કેસમાં ઝડપાયેલા પોલીસકર્મીઓની જામીન અરજી કોર્ટે ફગાવી દીધી છે. જેના કારણે કાયદાના રક્ષકો બનેલા આ ભક્ષકોને જેલમાં જ રહેવું પડશે. સમગ્ર ઘટના ત્યારે સામે આવી હતી જ્યારે સુરતના બારડોલીથી દમણમાં ફરવા આવેલા કેટલાક યુવકોને દમણ પોલીસે ખોટા કેસમાં ફસાવી દેવાની ધમકી આપી હતી.

બારડોલીના યુવકોને બંધક બનાવી 10 લાખ ખંડણી લીધી

પોલીસે આ યુવકોને ગેરકાયદેસર રીતે બંધક બનાવીને માર માર્યો હતો અને તેમની પાસેથી મોટી રકમની માંગણી કરી હતી. પોલીસકર્મીઓએ યુવકોને છોડવા માટે શરૂઆતમાં 25 લાખ રૂપિયાની માંગણી કરી હતી. પરંતુ આખરે 10 લાખ રૂપિયાની ખંડણી લેવાનું નક્કી થયું હતું. યુવકો પાસેથી 7 લાખ રૂપિયા રોકડા પડાવી લેવામાં આવ્યા હતા અને બાકીના 3 લાખ રૂપિયા પછીથી આપવાની શરતે તેમને મુક્ત કરવામાં આવ્યા હતા. આ ગંભીર આરોપ લાગતા જ દમણ પોલીસ વિભાગમાં હડકંપ મચી ગયો હતો.

તોડ કરતાં પોલીસકર્મીની જામીન અરજી ફગાવાઇ

આ તોડકાંડમાં ક્રાઇમ બ્રાન્ચના એક પીએસઆઇ સહિત કુલ 9 પોલીસકર્મીઓ સામે ગુનો નોંધી તેમની ધરપકડ કરવામાં આવી હતી. તાજેતરમાં આ કેસમાં સંડોવાયેલા આરોપી પોલીસકર્મીઓ દ્વારા કોર્ટમાં જામીન અરજી દાખલ કરવામાં આવી હતી. જોકે કોર્ટે આ સમગ્ર કેસની ગંભીરતાને ધ્યાનમાં લઈને અને આરોપીઓ કાયદાના રક્ષક હોવા છતાં ખંડણી જેવા ગંભીર ગુનામાં સંડોવાયેલા હોવાથી તેમની જામીન અરજી નામંજૂર કરી દીધી છે. કોર્ટના આ નિર્ણયથી કાયદામાં વિશ્વાસ રાખતા લોકોને ન્યાય મળ્યાની લાગણી થઈ છે.