Dahod News: ભારે વરસાદથી પાટાડુંગરી ડેમ ઓવરફ્લો થયો, લીમડીથી સીમલીયા જતો કોઝ વે પાણીમાં ગરકાવ

દાહોદમાં ભારે વરસાદને કારણે જનજીવનને અસર પહોંચી છે. દાહોદની જીવાદોરી સમાન પાટાડુંગરી ડેમમાં વરસાદના નવા નીર આવવાથી ઓવરફ્લો થયો છે. ડેમ ઓવરફ્લો થતાં નીચાણવાળા વિસ્તારોને એલર્ટ કરી દેવાયા છે. બીજી તરફ ભારે વરસાદ અને ઉપરવાસમાંથી પાણી આવવાથી લીમડીથી સીમલીયા જતો કોઝવે પાણીમાં ગરકાવ થયો છે. દાહોદના ગ્રામ્ય વિસ્તારોમાં પણ મોડી રાત્રે ભારે વરસાદને કારણે પાણી ભરાઈ ગયા હતાં.

ખેડૂતોમાં ખુશીની લાગણી જોવા મળી

દાહોદમાં વરસાદને કારણે હાલાકી સર્જાઈ છે. જનજીવનને અસર પહોંચી છે. પાટા ડુંગરી ડેમમાં ઉપરવાસ અને વરસાદી પાણીની આવક થતાં ડેમ ઓવરફ્લો થયો છે. જેના કારણે નીચાણવાળા વિસ્તારોને એલર્ટ કરી દેવાયા છે. વરમખેડા, બોરખેડા, જાલત, મોટી ખરજ, પુંસરી, પાંચવાડા, સાહડા, દેવધા ગામને એલર્ટ કરવામાં આવ્યાં છે. ડેમમાં નવા નીરની આવક થતાં ખેડૂતોમાં ખુશીની લાગણી જોવા મળી છે.

રસ્તો બંધ કરતા અનેક ગામ સંપર્ક વિહોણા થયા

દાહોદના ઝાલોદ તાલુકામાં ભારે વરસાદને કારણે લીમડીથી સીમલીયા જતો કોઝ વે પાણીમાં ગરકાવ થઈ ગયો છે. કોઝ વે પર પાણી ભરાતા રસ્તો બંધ થઈ ગયો છે. લોકો અવરજવર માટે 10 કિ.મી સુધી ફરવા મજબૂર બન્યાં છે. ભારે વરસાદને કારણે દોહાદના લીમખેડાની હડફ નદી બે કાંઠે વહેતી થઈ છે. નદીમાં નવા નીર આવતા ખેડૂતોમાં પણ ભારે ઉત્સાહ જોવા મળ્યો છે. દાહોદના સીંગવડનગરમાં લોકોના ઘરમાં પાણી ફરી વળ્યા હતાં. રસ્તા બંધ થતાં અનેક ગામ સંપર્ક વિહોણા બન્યાં છે.