Bhavnagar: તળાજામાં વૃદ્ધ સોની દંપતીની સળગેલી હાલતમાં મૃતદેહ મળતા અરેરાટી, મધરાતે બનેલી ઘટનાથી રહસ્ય ઘેરાયું

ભાવનગર જિલ્લાના તળાજા શહેરમાંથી એક અત્યંત કરુણ અને ચોંકાવનારી ઘટના સામે આવી છે. અહીં એક વૃદ્ધ સોની દંપતીની તેમના જ ઘરમાંથી સળગેલી હાલતમાં મૃતદેહ મળી આવતા સમગ્ર પંથકમાં ચકચાર મચી ગઈ છે. પ્રાથમિક તપાસમાં પોલીસે આ ઘટના આત્મહત્યા હોવાનું અનુમાન વ્યક્ત કર્યું છે.

પથારીમાં જ સળગી ગયા પતિ-પત્ની

મળતી માહિતી મુજબ, મૃતક દંપતીની ઓળખ કિશોરભાઈ વૈઠા અને રેખાબેન વૈઠા તરીકે થઈ છે. ઘટના મોડી રાત્રે અંદાજે 2:30 વાગ્યાની આસપાસ બની હોવાનું મનાય છે. આશ્ચર્યની વાત એ છે કે, જે પથારીમાં દંપતી સૂતું હતું તે પથારી અડધી સળગેલી હાલતમાં મળી આવી છે. પલંગ પર જ બંનેની લાશ સળગેલી અવસ્થામાં જોવા મળી હતી.

આસપાસના લોકોને જાણ સુધ્ધાં ન થઈ

આ ઘટનાનું સૌથી મોટું રહસ્ય એ છે કે, મધરાતે ઘરમાં આગ લાગી હોવા છતાં આસપાસના પાડોશીઓ કે મહોલ્લાના લોકોને તેની જરા પણ જાણ થઈ ન હતી. આગના ધુમાડા કે બૂમાબૂમ જેવી કોઈ પણ હિલચાલ બહાર ન આવતા અનેક તર્ક-વિતર્ક સર્જાઈ રહ્યા છે. સવારે જ્યારે ઘટનાની જાણ થઈ ત્યારે પોલીસ કાફલો ઘટનાસ્થળે દોડી આવ્યો હતો.

આ પણ વાંચો: Surat: ONGCમાં નોકરીના બહાને 32 લાખનો ચૂનો, કતારગામના દંપતીએ આપ્યા નકલી જોઈનિંગ લેટર અને આઈડી કાર્ડ