Banaskantha News: ભાભરમાં પોલીસ કોન્સ્ટેબલને માર મારીને કપડા ફાડી નાંખ્યા, મોબાઈલ લૂંટીને શખ્સો ફરાર

ગુજરાતમાં લોકોની સલામતી માટે પોલીસ ખડે પગે રહે છે. ત્યારે પોલીસ પર પણ હુમલાની અનેક ઘટનાઓ સામે આવતી હોય છે. બનાસકાંઠાના ભાભરમાં પોલીસ પણ સલામત નહીં હોવાની ઘટના સામે આવી છે. કેટલાક શખ્સોએ પેટ્રોલિંગ કરતા કોન્સ્ટેબલને માર મારીને મોબાઈલ લૂંટી લીધો હોવાનો બનાવ સામે આવતાં પોલીસે આરોપીઓને પકડવા તજવીજ શરૂ કરી છે.

પેટ્રોલિંગ કરતા કોન્સ્ટેબલને માર મારી મોબાઇલ લૂંટી લીધો

બનાસકાંઠાના ભાભરમાં મારામારી કરતાં બે લોકોને પેટ્રોલિંગમાં રહેલા કોન્સ્ટેબલે રોકવાનો પ્રયાસ કર્યો હતો. આ દરમિયાન કોન્સ્ટેબલને માર મારીને કેટલાક લોકો મોબાઈલ ફોન લૂંટીને ફરાર થઈ ગયા હતાં. આરોપીઓએ કોન્સ્ટેબલને માર મારીને તેના કપડાં પણ ફાડી નાંખ્યા હતાં. કોન્સ્ટેબલ વિક્રમ ચૌધરીએ ચાર લોકો સામે ફરિયાદ નોંધાવી છે. ફરિયાદના આધારે પોલીસે આરોપીઓને પકડવા તજવીજ હાથ ધરી છે.

પોલીસે આરોપીઓને પકડવા કાર્યવાહી શરૂ કરી

ભાભર ટાઉનમાં ફરજ બજાવતા કોન્સ્ટેબલ મોટર સાઇકલ લઈને પેટ્રોલિંગમાં હતા તે દરમિયાન નગરપાલિકાના ઈલેક્ટ્રીશીયન સાથે બે શખ્સો મારામારી કરી રહ્યા હતાં. તેમાં બચાવવા જતાં આ શખ્સો દ્વારા કોન્સ્ટેબલને માર મારવામાં આવ્યો હતો અને તેના કપડાં ફાડીને મોબાઈલ પણ લૂંટી લીધો હતો. કોન્સ્ટેબલે ચાર લોકો સામે ફરિયાદ કરતાં ભાભર પોલીસ દ્વારા પોલીસની ટીમો બનાવી આરોપીઓને પકડવાની કાર્યવાહી હાથ ધરવામાં આવી છે.