Badoli: ઈડરમાં દુકાનદારો પાસેથી પૈસા પડાવતો નકલી ફૂડ ઈન્સ્પેક્ટર અંતે પકડાઈ ગયો

સાબરકાંઠા સહિત ગુજરાત અન્ય સ્થળે નકલી અધિકારીઓ, કર્મચારીઓ તથા પોલીસની ઓળખ આપી લોકોને ભરમાવી કાયદાની બીક બતાવી રૂપિયા પડવતા હોવાની ઘટનાઓ ભુતકાળમાં બની છે ત્યારે શુક્રવારે સાબરકાંઠા જિલ્લાના ઈડર સ્થિત કરિયાણાના વેપારીઓને ફૂડ ઈન્સ્પેકટરના નામે દુકાનમાં જઈ તપાસ કરી રૂપિયા પડાવતા આ નકલી ફૂડ ઈન્સ્પેકટરને વેપારીઓ ઝડપી લઈ મેથીપાક આપ્યા બાદ તેને ઈડર પોલીસને હવાલે કર્યો હતો.

આ અંગે સૂત્રોમાંથી મળતી માહિત મુજબ છેલ્લા બે દિવસથી ઈડરમાં કરિયાણાનો ધંધો કરતા વેપારીઓ પાસે જઈને પાટણના આકાશ વાઘેલા નામના શખ્સે રોફ જમાવીને કરિયાણાના વેપારીઓની દુકાનમાં તપાસ કરી રોફ જમાવતો હતો. દરમ્યાન શુક્રવારે બ્રિજેશ ભાવસાર નામના એક વેપારી પાસે જઈને આકાશ વાઘેલાએ ખોટી ઓળખ આપીને કહયું હતુ કે ગાંધીનગરથી કે.એસ.પટેલે મને તપાસ કરવા માટે મોકલ્યો છે. તેમ કહયા બાદ આ નકલી ફૂડ ઈન્સ્પેકટરે કેટલાક દસ્તાવેજો બતાવીને વેપારીઓને ભયભીત કરી દીધા હતા. તે પછી દુકાનમાં તપાસનું તરકટ કરીને કેટલીક ચીજવસ્તુઓ તપાસી ખોટી રીતે રૂ.1500 લેતો હતો ઈડરમાં સતત બે દિવસથી આ નકલી ફૂડ ઈન્સ્પેકટર વેપારીઓને દમ મારીને પૈસા પડાવતો હોવાની રીતભાત જોઈને કેટલાક વેપારીઓને શંકા ગઈ હતી ત્યારબાદ નકલી ફૂડ ઈન્સ્પેકટર બની આવેલા પાટણના આકાશ વાઘેલાને વેપારીઓ મેથીપાક ચખાડયો હતો ત્યારબાદ નકલી ફૂડ ઈન્સ્પેકટરને ઈડર પોલીસને હવાલે કરાયો હતો ત્યારબાદ શુક્રવારે સાંજ સુધીમાં કોઈ વેપારીએ આ નકલી ફૂડ ઈન્સ્પેકટર સામે ફરીયાદ નોંધાવી નથી તેવું આધારભુત સૂત્રોમાંથી જણાવાયું હતું.