Aravalliના ચોપલાવત ગામે અકસ્માતોનો સિલસિલો યથાવત: વધુ એક યુવકનું મોત થતા ગ્રામજનોનો હાઈવે પર ચક્કાજામ!

Aravalliના ચોપલાવત ગામે અકસ્માતોનો સિલસિલો યથાવત: વધુ એક યુવકનું મોત થતા ગ્રામજનોનો હાઈવે પર ચક્કાજામ!

અરવલ્લી જિલ્લામાંથી એક મોટા સમાચાર સામે આવ્યા છે. બાયડ-લુણાવાડા હાઈવે પર આવેલા ચોપલાવત ગામ પાસે અકસ્માતોનો સિલસિલો અટકવાનું નામ નથી લઈ રહ્યો. ગઈકાલે વધુ એક વ્યક્તિનું માર્ગ અકસ્માતમાં કરુણ મોત નીપજતા સ્થાનિક રહીશો અને ગ્રામજનોમાં તંત્ર સામે ભારે રોષ ફેલાઈ ગયો છે. અવારનવાર બનતી આ પ્રકારની દુર્ઘટનાઓથી પંથકમાં શોકનું મોજું ફરી વળ્યું છે.

તંત્રની ઉદાસીનતા સામે રસ્તા પર ઉતર્યા ગ્રામજનો

વારંવાર રજૂઆતો કરવા છતાં તંત્ર દ્વારા કોઈ નક્કર પગલાં ન લેવાતા આખરે ગ્રામજનોનો આક્રોશ ફાટી નીકળ્યો હતો. મોટી સંખ્યામાં માતાઓ, બહેનો અને યુવાનો સહિતના ગ્રામજનો રસ્તા પર ઉતરી આવ્યા હતા અને મધરાત્રે હાઈવે પર ચક્કાજામ કરી દીધો હતો. આ ચક્કાજામના કારણે હાઈવેની બંને બાજુએ વાહનોની લાંબી કતારો લાગી ગઈ હતી, જેના દ્રશ્યો સોશિયલ મીડિયામાં પણ જોરશોરથી વાયરલ થઈ રહ્યા છે.

સ્પીડ બ્રેકર અને સ્ટ્રીટલાઈટ સહિતની સુરક્ષા સુવિધાઓની માગ

ગ્રામજનો દ્વારા સ્પષ્ટ ચીમકી આપવામાં આવી છે કે હવે માત્ર ખોટા આશ્વાસનો નહીં ચાલે, પરંતુ તાત્કાલિક ધોરણે સુરક્ષાનાં પગલાં લેવામાં આવે. તેમની મુખ્ય માંગણીઓ છે કે હાઈવે પર યોગ્ય સ્પીડ બ્રેકર અને રંબલ સ્ટ્રીપ્સ બનાવવામાં આવે, વાહનચાલકો માટે ચેતવણી દર્શાવતા બોર્ડ મૂકવામાં આવે તેમજ રાત્રિના સમયે દ્રશ્યતા વધારવા માટે સ્ટ્રીટલાઈટની કાયમી વ્યવસ્થા કરવામાં આવે. સ્થાનિક પોલીસ અને વહીવટી તંત્ર દ્વારા ઘટનાસ્થળે પહોંચીને ગ્રામજનોને સમજાવવાના પ્રયાસો હાથ ધરવામાં આવ્યા છે અને વહેલી તકે યોગ્ય સુરક્ષા સુવિધાઓ ઊભી કરવાની ખાતરી આપવામાં આવી છે.

ગુજરાતના વધુ સમાચાર વાંચવા માટે ક્લિક કરો