Aravalli એલસીબીને મળી મોટી સફળતા: રાજ્યભરમાં 49 ગુના આચરનાર રીઢો તસ્કર ઝડપાયો

અરવલ્લી જિલ્લા લોકલ ક્રાઈમ બ્રાન્ચ (LCB)ની ટીમને આંતરજિલ્લા ચોરી કરતી ગેંગને પકડવામાં એક બહુ મોટી સફળતા મળી છે. પોલીસે ગુજરાતના જુદા જુદા જિલ્લાઓમાં અત્યાર સુધીમાં 49 જેટલા ચોરીના ગુનાઓમાં સંડોવાયેલા એક રીઢા અને મોસ્ટ વોન્ટેડ આરોપીને ઝડપી પાડ્યો છે. આ શાતિર તસ્કરની ધરપકડ થતાં જ અરવલ્લી જિલ્લામાં બનેલી ચોરીની ચાર મહત્વની ઘટનાઓનો ભેદ ઉકેલાઈ ગયો છે. આ સફળ કામગીરીથી પોલીસ તંત્રે રાહતનો શ્વાસ લીધો છે.

મહીસાગર અને અમદાવાદમાં પણ આચરી હતી ચોરીઓ

પોલીસની પ્રાથમિક પૂછપરછમાં સામે આવ્યું છે કે પકડાયેલા આરોપીએ માત્ર અરવલ્લી જ નહીં, પરંતુ મહીસાગર અને અમદાવાદ જિલ્લાના અનેક વિસ્તારોને પણ નિશાન બનાવ્યા હતા. અરવલ્લી એલસીબીની ટીમે ચોક્કસ બાતમીના આધારે ઓપરેશન હાથ ધરીને મહીસાગર જિલ્લાના વડાગામ ખાતેથી સિરાજ નામના આ રીઢા ગુનેગારને દબોચી લીધો હતો. આરોપીએ અરવલ્લી જિલ્લાના મોડાસા, સાકરીયા અને માલપુરના સોમપુર ગામમાં આવેલી 3 દુકાનોમાં ચોરી તેમજ એક વાહન ચોરીની કબૂલાત કરી છે.

લાખોનો મુદ્દામાલ જપ્ત: મુખ્ય માસ્ટરમાઇન્ડ 'જીગા'ને પકડવા તજવીજ

પોલીસે પકડાયેલા આરોપી સિરાજ પાસેથી ચોરીના અલગ-અલગ ગુનાઓમાં સંડોવાયેલો અંદાજે રૂ.2.18 લાખની કિંમતનો મુદ્દામાલ રિકવર કરીને જપ્ત કર્યો છે. જો કે, પોલીસ તપાસમાં એવી ચોંકાવનારી વિગત પણ બહાર આવી છે કે આ સમગ્ર ચોરીની ઘટનાઓ પાછળ 'જીગો' નામનો એક મુખ્ય માસ્ટરમાઇન્ડ ઓપરેટ કરી રહ્યો છે. આ આખી ગેંગના મુખ્ય સૂત્રધાર જીગાને પકડવા માટે એલસીબી દ્વારા અલગ-અલગ ટીમો બનાવીને ચક્રો ગતિમાન કરવામાં આવ્યા છે અને તેને પણ ટૂંક સમયમાં જેલભેગો કરવામાં આવશે તેવો દાવો પોલીસે કર્યો છે.

ગુજરાતના વધુ સમાચાર વાંચવા માટે ક્લિક કરો