Ahmedabadમાં દારૂના નશામાં ચૂર બેન્ક મેનેજરે ગુરુકુલથી દૂરદર્શન મેટ્રો સુધી એક્ટિવાને રસ્તા પર ઘસડ્યું....

અમદાવાદ શહેરમાં દારૂબંધીના કાયદાના ધજાગરા ઉડાડતી અને બેફામ બનેલા નશાખોરોની લાપરવાહી દર્શાવતી એક ચોંકાવનારી ઘટના સામે આવી છે. શહેરના પોશ વિસ્તાર ગણાતા ગુરુકુલ અને વસ્ત્રાપુર પંથકમાં પ્રાઇવેટ બેન્કના એક બ્રાન્ચ મેનેજરે દારૂના નશામાં ચૂર થઈને હાઇવોલ્ટેજ ડ્રામા અને હોબાળો મચાવ્યો હતો. આ ઘટનાને પગલે રસ્તા પર ભારે અફરાતફરી મચી ગઈ હતી. 

ગુરુકુલથી દૂરદર્શન કેન્દ્ર મેટ્રો સુધી એક્ટિવા ઘસડતો રહ્યો

પ્રાપ્ત વિગતો અનુસાર, એક્સિસ બેન્કનો એક બ્રાન્ચ મેનેજર ભારે નશાની હાલતમાં પોતાનું એક્ટિવા લઈને નીકળ્યો હતો. તેણે ગુરુકુલ વિસ્તારથી લઈને દૂરદર્શન કેન્દ્ર મેટ્રો સ્ટેશન સુધીના લાંબા અંતર સુધી એક્ટિવાને ચલાવવાને બદલે રસ્તા પર ઘસડીને અજીબોગરીબ હરકતો કરી હતી. નશામાં ધૂત ચાલકની આ બેજવાબદાર હરકતના કારણે રોડ પર પસાર થતા અન્ય વાહનચાલકો અને રાહદારીઓના પ્રાણ જોખમમાં મુકાયા હતા. વાહનને ઘસડવાને કારણે રસ્તા પર અવાજો અને ઘર્ષણને કારણે લોકો ચોંકી ઉઠ્યા હતા. 

જાગૃત પબ્લિકે વાહન અટકાવી મેનેજરને બહાર કાઢ્યો

નશામાં ધૂત ચાલકની આ હરકત જોઈને આસપાસના રાહદારીઓ અને રોડ પરના લોકો એકઠા થઈ ગયા હતા. પરિસ્થિતિની ગંભીરતા પારખીને જાગૃત નાગરિકોએ તાત્કાલિક સાહસ દાખવીને તે વાહનચાલકને ઘેરી લીધો હતો અને એક્ટિવા અટકાવીને તેને વાહનમાંથી નીચે ખેંચી બહાર કાઢ્યો હતો. લોકોએ રોષ વ્યક્ત કરતા આ અંગે ત્વરિત પોલીસને જાણ કરી હતી.વસ્ત્રાપુર પોલીસ સ્ટેશને ખસેડાયો

ઘટનાની જાણ થતાં જ વસ્ત્રાપુર પોલીસ સ્ટેશનની ટીમ તુરંત જ ઘટનાસ્થળે દોડી આવી હતી. પોલીસે સ્થળ પર પહોંચીને નશામાં ધૂત બેન્ક મેનેજરને પોતાના તાબામાં લીધો હતો અને કાયદેસરની કાર્યવાહી હાથ ધરીને તેને પોલીસ સ્ટેશન ખાતે લઈ ગઈ હતી. પોલીસ દ્વારા મેનેજર સામે કાયદેસરનો ગુનો નોંધીને ડ્રંક એન્ડ ડ્રાઇવ તેમજ પબ્લિક પ્લેસ પર નશો કરી અડપલાં કરવા અંગે કડક કાર્યવાહીની તજવીજ હાથ ધરવામાં આવી છે.

ગુજરાતના વધુ સમાચાર વાંચવા માટે ક્લિક કરો