Ahmedabadમાં ગોડસે નાટકનો ઉગ્ર વિરોધ, પંડિત દીનદયાલ હોલમાં NSUIએ મચાવ્યો હોબાળો

અમદાવાદના બોડકદેવ વિસ્તારમાં આવેલા પંડિત દીનદયાલ હોલ ખાતે આવતીકાલે નથુરામ ગોડસે પર આધારિત એક નાટક ભજવવામાં આવનાર છે. જોકે, આ નાટક મંચસ્થ થાય તે પહેલા જ શહેરમાં વિરોધ પ્રદર્શન શરૂ થઈ ગયા છે. NSUI (નેશનલ સ્ટુડન્ટ્સ યુનિયન ઓફ ઈન્ડિયા) ના કાર્યકરોએ આજે હોલ ખાતે પહોંચીને ભારે હોબાળો મચાવ્યો હતો અને નાટકનો ઉગ્ર વિરોધ નોંધાવ્યો હતો.

દીવાલો પર સૂત્રોચ્ચાર અને વિરોધ

NSUI ના કાર્યકરોએ પંડિત દીનદયાલ હોલની દીવાલો પર 'ગોડસે મુર્દાબાદ' ના લખાણો લખી પોતાનો આક્રોશ વ્યક્ત કર્યો હતો. કાર્યકરોએ ગોડસે વિરુદ્ધ ઉગ્ર સૂત્રોચ્ચાર કર્યા હતા અને જણાવ્યું હતું કે, ગાંધીજીના હત્યારાનું મહિમામંડન કરતું કોઈપણ નાટક ગુજરાતની ધરતી પર સહન કરવામાં આવશે નહીં.

રાજકોટ અને જામનગર બાદ હવે અમદાવાદમાં વિરોધ

નોંધનીય છે કે આ નાટક સામેનો વિરોધ માત્ર અમદાવાદ પૂરતો મર્યાદિત નથી. અગાઉ રાજકોટ અને જામનગરમાં પણ જ્યારે આ નાટક ભજવવાની જાહેરાત થઈ હતી, ત્યારે કોંગ્રેસ અને વિવિધ સંગઠનો દ્વારા તેનો સખત વિરોધ કરવામાં આવ્યો હતો. આવતીકાલે પંડિત દીનદયાલ હોલ ખાતે નાટક ભજવવાનું નક્કી છે, પરંતુ આજની ઘટના બાદ સુરક્ષા વ્યવસ્થા અને નાટકના આયોજન પર સવાલો ઊભા થયા છે. વિરોધને જોતા હોલની આસપાસ પોલીસ બંદોબસ્ત વધારી દેવામાં આવ્યો છે.

ગુજરાતના વધુ સમાચાર વાંચવા માટે ક્લિક કરો