Ahmedabad : વારાણસી-સાબરમતી વચ્ચે નવી સુપરફાસ્ટ ટ્રેનને મંજૂરી, ત્રણ રાજ્યોના મુસાફરોને મળશે રાહત

રેલવે બોર્ડ દ્વારા મુસાફરો અને પ્રવાસીઓની માંગને ધ્યાનમાં રાખીને વારાણસી અને સાબરમતી વચ્ચે નવી સુપરફાસ્ટ એક્સપ્રેસ ટ્રેનના સંચાલન માટે રૂટ તેમજ સ્ટોપેજને સત્તાવાર મંજૂરી આપી દેવામાં આવી છે. આ મહત્વપૂર્ણ નિર્ણયથી ઉત્તર પ્રદેશ, રાજસ્થાન અને ગુજરાત વચ્ચે સીધો સંપર્ક સ્થાપિત થશે. આ ટ્રેન શરૂ થવાથી ત્રણેય રાજ્યોના ધાર્મિક સ્થળો તથા પ્રવાસન કેન્દ્રો જોડાશે.

વારાણસી-સાબરમતી સુપરફાસ્ટ એક્સપ્રેસને મંજૂરી

રેલવે બોર્ડના જણાવ્યા અનુસાર, ટ્રેન નંબર 12205/12206 વારાણસી-સાબરમતી સુપરફાસ્ટ એક્સપ્રેસને અનેક અગત્યના મુખ્ય સ્ટેશનો પરથી ચલાવવાની મંજૂરી મળી ગઈ છે. આ સુપરફાસ્ટ એક્સપ્રેસ ટ્રેન મુખ્યત્વે ગોવિંદપુરી, ટુંડલા, ભરતપુર, જયપુર, અજમેર અને આબુ રોડ થઈને દોડાવવામાં આવશે. 

વારાણસી જંક્શનથી સાંજે 5:30 વાગ્યે ઉપડશે 

સમયપત્રક મુજબ, ટ્રેન નંબર 12206 વારાણસી જંક્શનથી સાંજે 5:30 વાગ્યે ઉપડશે અને બીજા દિવસે રાત્રે 8:15 વાગ્યે સાબરમતી સ્ટેશને આવી પહોંચશે.

સાબરમતી સ્ટેશનથી સવારે 5:20 વાગ્યે પ્રસ્થાન કરશે

જ્યારે વળતી દિશામાં ટ્રેન નંબર 12205 સાબરમતી સ્ટેશનથી સવારે 5:20 વાગ્યે પ્રસ્થાન કરશે અને બીજા દિવસે સવારે 6:30 વાગ્યે વારાણસી જંક્શન પર પહોંચશે. આ ટ્રેન શરૂ થવાથી ઉત્તર પ્રદેશ, રાજસ્થાન અને ગુજરાતના નાગરિકોને સીધી અને ઝડપી મુસાફરીનો મોટો લાભ મળશે.અત્યાધુનિક 22 કોચ ધરાવતા એલએચબી રેકની ફાળવણી

આ નવી સુપરફાસ્ટ ટ્રેન સેવા માટે રેલવે પ્રશાસન તરફથી અત્યાધુનિક 22 કોચ ધરાવતા એલએચબી (LHB) રેકની ફાળવણી કરવામાં આવી છે. લાંબા અંતરની આ ટ્રેનનું પ્રાથમિક મેન્ટેનન્સ વારાણસી ખાતે જ પૂર્ણ કરવામાં આવશે. મુસાફરી દરમિયાન પ્રવાસીઓની સગવડ અર્થે ગોવિંદપુરી, ટુંડલા અને જયપુર સ્ટેશનો પર ટ્રેનના ડબ્બાઓમાં પાણી ભરવાની ખાસ વ્યવસ્થા કરવામાં આવશે.ધાર્મિક અને પર્યટન સ્થળો વચ્ચે સીધો સંપર્ક થશે

આ સુપરફાસ્ટ ટ્રેન ખાસ કરીને ત્રણેય રાજ્યોના વેપારીઓ, વિદ્યાર્થીઓ અને પર્યટકો માટે અત્યંત મહત્વપૂર્ણ સાબિત થશે. ધાર્મિક અને પર્યટન સ્થળો વચ્ચે સીધો સંપર્ક થવાથી મુસાફરોને મોટી રાહત રહેશે. રેલવે પ્રશાસન દ્વારા ટૂંક સમયમાં જ આ ટ્રેનના નિયમિત સંચાલનની શરૂઆત માટે સત્તાવાર તારીખ જાહેર કરવામાં આવશે તેવી આશા વ્યક્ત કરવામાં આવી રહી છે. જે પ્રવાસીઓ માટે અત્યંત ઉપયોગી બનશે. 

 આ પણ વાંચો:   Dussehra Explainer: ફાફડા જલેબી આરોગી લીધા ? તો હવે વાંચો કે તમારા ચટકારાનો આખો ફંડા શું છે..