Ahmedabad: જન્મદિવસ સેલિબ્રેટ કરવા પાડોશી યુવકનું કારસ્તાનઃવૃદ્ધાની હત્યા કરી બુટ્ટી કાઢી લીધી

ખોખરામાં બે મહિના અગાઉ 85 વર્ષીય વૃદ્ધા ધનીબેન વાઘેલાની લાશ મળી આવી હતી. આ અંગે ખોખરા પોલીસે તપાસ શરૂ કરી હતી.

દરમિયાનમાં અમરાઈવાડી પોલીસને બાતમી મળી હતી કે, પાડોશમાં રહેતો યુવક જ હત્યામાં સંડોવાયેલો છે. પોલીસે યુવકની ધરપકડ કરી પૂછપરછ કરતા જન્મ દિવસની ઉજવણી કરવા અને મકાનનું ભાડું ભરવા વૃદ્ધાની હત્યા કરીને બુટ્ટી કાઢીને વેચી દીધી હતી. આ અંગે પોલીસે વધુ તપાસ શરૂ કરી છે.

ખોખરામાં ફ્રૂટવાળી ચાલીમાં રહેતાં 85 વર્ષીય ધનીબેન વાઘેલાની સપ્ટેમ્બર મહિનામાં હત્યા કરાયેલી હાલતમાં લાશ મળી આવી હતી. પાડોશીઓને દુર્ગંધ આવતા સ્થાનિકોએ પોલીસને બનાવ અંગેની જાણ કરતા ખોખરા પોલીસે ઘટના સ્થળે આવી લાશને પોસ્ટમોર્ટમ મોકલી આપી તપાસ શરૂ કરી હતી. પોલીસે સીસીટીવી ફૂટેજની તપાસ કરતા વૃદ્ધાની પાડોશમાં રહેતો સચિન ઠાકોર બનાવના દિવસે વૃદ્ધાના ઘરે આવ્યો હતો. સચિન દોઢ વર્ષ પહેલાં તેમની પાડોશમાં રહેવા આવ્યો હતો. ત્યારબાદ પોલીસે સચિન ઠાકોરની અટકાયત કરીને કડક પૂછપરછ કરતા તેણે હત્યા કરી હોવાની કબૂલાત કરી હતી. જેમાં ગત 13 સપ્ટેમ્બરે તેનો જન્મદિવસ આવતો હતો અને મકાનનું ભાડું ભરવાનું બાકી હોવાથી રૂપિયાની જરૂરિયાત ઊભી થતા વૃદ્ધાના ગળે ઓશિકું મૂકીને ગળું દબાવી મોતને ઘાટ ઉતારી દીધા હતા. ત્યારબાદ પોલીસે સચિન ઠાકોરની હત્યાના ગુનામાં ધરપકડ કરી કાયદેસરની કાર્યવાહી હાથ ધરી છે. તેમજ હત્યા કર્યા બાદ તે વૃદ્ધાએ પહેરેલ બુટ્ટી કાઢીને પાટણ ગયો હતો, જ્યાં તેણે બુટ્ટી વેચી દીધી હતી. જે પૈસા આવ્યા તેમાંથી જન્મદિવસ ઉજવવા મંદિરગયો હતો. મકાનના ભાડાના 8 હજાર રૂપિયા પણ મકાન માલિકને આપી દીધા હતા.