Ahmedabad: SG હાઇવે પર ગંભીર અકસ્માત, સોલા હાઇકોર્ટ નજીક સામસામે ટકરાતા બંને કાર પલટી

અમદાવાદના વ્યસ્ત ગણાતા સરખેજ-ગાંધીનગર (SG) હાઇવે પર સોલા હાઇકોર્ટ પોલીસ સ્ટેશન નજીક આજે એક ગંભીર માર્ગ અકસ્માતની ઘટના સામે આવી છે. આ અકસ્માતમાં બે કાર સામસામે જોરદાર રીતે ટકરાઈ હતી, જેના પગલે બંને કારે પલટી ખાધી હતી.પ્રાથમિક માહિતી મુજબ, SG હાઇવે પર પૂરપાટ ઝડપે આવી રહેલી બે કાર અચાનક સામસામે અથડાઈ હતી. ટક્કર એટલી ભયાનક હતી કે બ્લેક કલરની સેડાન અને અન્ય એક કાર બંને રોડ પર પલટી ખાઈ ગઈ હતી. અકસ્માત થતાં જ આસપાસના લોકો ઘટનાસ્થળે દોડી આવ્યા હતા અને રાહતની કામગીરી શરૂ કરી હતી.

 એસજી હાઇવે પર બે કાર વચ્ચે અકસ્માત

આ અકસ્માતમાં એક કારચાલકને ઇજાઓ પહોંચતા તેને તાત્કાલિક સારવાર અર્થે નજીકની હોસ્પિટલ ખાતે ખસેડવામાં આવ્યો હતો. સદભાગ્યે, કોઈ મોટી જાનહાનિના સમાચાર નથી. આ ઘટના પીક અવર્સ દરમિયાન બની હોવાને કારણે SG હાઇવે પર તુરંત જ ટ્રાફિકજામની સ્થિતિ સર્જાઈ હતી. કાર પલટી ખાઈ જવાથી અને રોડ વચ્ચે અકસ્માતગ્રસ્ત વાહનો પડી રહેવાથી વાહનોની લાંબી કતારો લાગી ગઈ હતી.

અકસ્માતને પગલે સર્જાયો ટ્રાફિકજામ

બનાવની જાણ થતાં જ સ્થાનિક ટ્રાફિક પોલીસનો કાફલો તાત્કાલિક ઘટનાસ્થળે આવી પહોંચ્યો હતો. પોલીસે તુરંત જ બચાવ કામગીરી હાથ ધરીને ટ્રાફિકને હળવો કરવાની કામગીરી શરૂ કરી હતી. ક્રેનની મદદથી અકસ્માતગ્રસ્ત બંને કારને રોડ પરથી હટાવવાની પ્રક્રિયા શરૂ કરાઈ હતી. પોલીસે ટ્રાફિકને વૈકલ્પિક રૂટ પર ડાયવર્ટ કરીને પરિસ્થિતિ પર નિયંત્રણ મેળવ્યું હતું. સોલા હાઇકોર્ટ નજીક અવારનવાર અકસ્માતોની ઘટનાઓ બનતી રહે છે, ત્યારે ફરી એકવાર આ ઘટનાએ હાઇવે પર બેફામ ડ્રાઇવિંગ અને સુરક્ષાના મુદ્દાઓ પર સવાલો ઊભા કર્યા છે. પોલીસે આ અકસ્માત માટે જવાબદાર વ્યક્તિ વિરુદ્ધ ગુનો નોંધીને વધુ કાયદેસરની કાર્યવાહી હાથ ધરી છે.