Vadodaraમાં બેફામ કારચાલકનો આતંક, મકરપુરા વિસ્તારમાં ટુ-વ્હીલર ચાલકને લીધો અડફેટે

વડોદરા શહેરમાં બેફામ ડ્રાઇવિંગને કારણે અકસ્માતોની સંખ્યામાં સતત વધારો થઈ રહ્યો છે. શહેરના મકરપુરા વિસ્તારમાં આજે એક બેફામ કારચાલકે ટુ-વ્હીલર ચાલકને જોરદાર ટક્કર મારતા ગંભીર અકસ્માત સર્જાયો હતો. મકરપુરા વિસ્તારમાં એક કારચાલક અતિશય પૂરપાટ ઝડપે અને બેદરકારીપૂર્વક કાર ચલાવી રહ્યો હતો. આ બેફામ કારચાલકે રોડ પર જઈ રહેલા એક ટુ-વ્હીલર ચાલકને પાછળથી જોરદાર અડફેટે લીધો હતો.

મકરપુરામાં ટુ વ્હીલર ચાલકને લીધો અડફેટે

કારની ટક્કર એટલી જોરદાર હતી કે ટુ-વ્હીલર ચાલક વાહન સહિત હવામાં ફંગોળાઈને દૂર સુધી પડ્યો હતો. આ અકસ્માતમાં ટુ-વ્હીલર ચાલકને ગંભીર ઇજાઓ પહોંચી હતી. જેને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. અકસ્માતની આ સમગ્ર ઘટના રસ્તા પર લાગેલા CCTV કેમેરામાં કેદ થઈ ગઈ છે. જેના ફૂટેજ હવે સામે આવ્યા છે.

ટુ વ્હીલર ચાલકને પહોંચી ગંભીર ઇજાઓ

CCTV ફૂટેજમાં સ્પષ્ટ જોઈ શકાય છે કે કારચાલકની બેફામ ગતિના કારણે આ ગંભીર અકસ્માત સર્જાયો હતો. પોલીસે આ CCTV ફૂટેજના આધારે બેફામ કારચાલક વિરુદ્ધ ગુનો નોંધીને તેને ઝડપી પાડવાની કાર્યવાહી હાથ ધરી છે. શહેરના માર્ગો પર વાહનચાલકોની બેદરકારીને કારણે થતા અકસ્માતોને ડામવા માટે પોલીસે કડક પગલાં ભરવા જરૂરી બન્યા છે.