Ahmedabad: વેપારી પાસે 5 લાખની ખંડણી માગવાની ઘટના, મુખ્ય આરોપીની ધરપકડ

અમદાવાદમાં વધુ એક વખત અસામાજિક તત્વો દ્વારા વેપારી પાસે ખંડણી માગી હોવાની ઘટના સામે આવી છે. બે લોકોએ મેડિકલ સ્ટોરના માલિક પાસે ધંધો કરવો હશે તો પૈસા આપવા પડશે તેવી ખંડણીની માગણી કરી હોવાની ફરિયાદ સોલા પોલીસ મથકમાં નોંધાઈ છે. પોલીસે વેપારીની ફરિયાદને આધારે ખંડણીખોર મુખ્ય આરોપીની ધરપકડ કરી છે. ત્યારે કોણ છે આરોપી અને શું છે તેનો ગુનાહિત ઈતિહાસ, વાંચો આ અહેવાલમાં.બે લોકો વિરુદ્ધ સોલા પોલીસ મથકમાં ખંડણી માગવાની ફરિયાદ નોંધાઈ અમદાવાદના સોલા પોલીસ મથક વિસ્તારમાં આવેલા ચાણક્યપુરીમાં આવેલી મેડિકલ સ્ટોરના માલિક પાસે અસામાજિક તત્ત્વો દ્વારા ખંડણી માગવાની ઘટના સામે આવી છે. ચાણક્યપુરી વિસ્તારમાં આવેલી બનાસ મેડિકલના માલિક કિરીટકુમાર ઠક્કર દ્વારા બે લોકો વિરુદ્ધ સોલા પોલીસ મથકમાં ખંડણી માગવાની ફરિયાદ નોંધાવાઈ છે. મેડિકલ સ્ટોરના માલિક કિરીટકુમાર ઠક્કર દ્વારા નોંધાવેલી ફરિયાદના આધારે પોલીસે વિશાલ ઉર્ફે છોડીમેલ દેસાઈ નામના આરોપીની ધરપકડ કરી છે, જ્યારે વધુ એક અજાણ્યો વ્યક્તિ ફરાર છે જેની શોધખોળ પોલીસે હાથ ધરી છે. 5 લાખ રૂપિયાની ખંડણી માગી હતી આરોપી વિશાલ ઉર્ફે છોડીમેલ દેસાઈની પૂછપરછ તેમજ પોલીસની પ્રાથમિક તપાસમાં સામે આવ્યું છે કે આરોપી વિશાલ અને તેની સાથે અન્ય એક વ્યક્તિ ગત તારીખ 5 ફેબ્રુઆરીના સાંજના સમયે બનાસ મેડિકલ પર પહોંચી કિરીટકુમાર ઠક્કર પાસે 5 લાખ રૂપિયાની ખંડણીની માગણી કરી હતી. એટલું જ નહીં આરોપીએ ધમકી આપી હતી કે "મેડિકલની દુકાન ચલાવી હશે તો 5 લાખ રૂપિયા આપવા પડશે અને જો ખંડણી નહીં આપે તો તેના દીકરાને મારી નાખવાની ધમકી આપવામાં આવી હતી. ઉપરાંત દુકાનનો તમામ સામાન ભરી જવાની ધમકીઓ પણ મેડિકલ માલિકને આપી હતી, જેથી મેડિકલ માલિક કિરીટકુમાર દ્વારા સમગ્ર મામલે ફરિયાદ નોંધાવવામાં આવી હતી. આરોપી વિરૂદ્ધ 22 જેટલા ગુનાઓ નોંધાયેલા પોલીસ તપાસમાં સામે આવ્યું છે કે આરોપી વિશાલ ઉર્ફે છોડીમેલ દેસાઈ અગાઉ 22 જેટલા ગુનાઓમાં પોલીસ ચોપડે ચઢી ચૂક્યો છે. તેમજ ચાર વખત પાસાની સજા પણ ભોગવી ચુક્યો છે. આરોપી વિશાલ થોડા દિવસો પહેલા સોલા વિસ્તારમાં લૂંટના બનાવમાં પણ પોલીસે ધરપકડ કરી હતી, ત્યારે હવે પોલીસ તપાસ કરી રહી છે કે આરોપી વિશાલ દ્વારા અન્ય કોઈ વેપારી પાસે ખંડણી માગવામાં આવી છે કે કેમ.