Ahmedabad: પ્રેમ દરવાજા પાસેથી 7.14 લાખનો દારૂનો જથ્થો ઝડપાયો, બુટલેગરની કરાઈ ધરપકડ

ગુજરાતમાં માત્ર કહેવા પુરતી જ દારૂબંધી છે, તેવું જોવા મળી રહ્યું છે. રાજ્યમાં દરરોજ કોઈના કોઈના વિસ્તારમાંથી દારૂનો જથ્થો ઝડપાય છે. આ દરમિયાન અમદાવાદમાં પણ ફરી એક વખત દારૂનો મોટો જથ્થો ઝડપાયો છે. અમદાવાદના પ્રેમ દરવાજામાંથી દારુના જથ્થો જપ્ત કરવામાં આવ્યો છે. જેમાં બુટલેગરનો દારૂની હેરાફેરી કરવાનો નવો કીમિયો પણ સામે આવ્યો છે.

દિલ્હીથી બેટરીના પાર્સલમાં અમદાવાદ દારુ લવાઇ રહ્યો હતો

લોજિસ્ટિક ટ્રાન્સપોર્ટની આડમાં દારૂની હેરાફેરી કરવામાં આવી રહી હતી, જેનો પર્દાફાશ કરવામાં આવ્યો છે. દારૂની હેરાફેરી કરવાનો ક્રાઈમ બ્રાન્ચે પર્દાફાશ કર્યો છે. અલગ અલગ બેટરીના બોક્સમાં 180 જેટલી દારૂની બોટલ સાથે ક્રાઈમ બ્રાન્ચે કૂલ રૂપિયા 7.14 લાખની કિંમતનો મુદ્દામાલ કબજે કર્યો છે. ટ્રાન્સપોર્ટના વાહનમાં દારૂની હેરાફેરી કરવામાં આવી રહી હતી. દારૂની બોટલો દિલ્હીથી બેટરીના પાર્સલમાં અમદાવાદ લાવવામાં આવી રહી હતી. જો કે આ અંગેની બાતમી ક્રાઈમ બ્રાન્ચને અગાઉથી જ મળતા ટીમે પ્રેમ દરવાજા પાસે ગુરુ લોજીસ્ટિક ટ્રાન્સપોર્ટમાંથી દારૂનો જથ્થો કબજે કર્યો છે.

રાજકોટથી દારુની ડિલવરી લેવા આવેલા બુટલેગરની ધરપકડ

આ સાથે જ ક્રાઈમ બ્રાન્ચે રાજકોટથી દારુની ડિલવરી લેવા આવેલા બુટલેગરની પણ ધરપકડ કરી લીધી છે. દારુ લેવા આવેલા બુટલેગર રાજપાલસિંહ રાઠોડની સ્વીફ્ટ ગાડી સાથે ક્રાઈમ બ્રાન્ચે ધરપકડ કરી છે. આ સાથે જ દારૂ મગાવનારા રાજકોટના બુટલેગર યશ ઠાકરને પણ ક્રાઈમ બ્રાન્ચે વોન્ટેડ જાહેર કર્યો છે. ક્રાઈમ બ્રાન્ચે વોન્ટેડ આરોપીને ઝડપી લેવા માટે વધુ તપાસ હાથ ધરી છે.