Ahmedabad: દેશભરમાં અમદાવાદની સ્વચ્છતાનો દબદબો! ગત વર્ષની ઐતિહાસિક જીત બાદ હવે 2025-26ના એવોર્ડ પર નજર

સમગ્ર દેશમાં સ્વચ્છતા અને શહેરી વ્યવસ્થાપન ક્ષેત્રે અગ્રેસર રહેલા અમદાવાદ શહેર માટે વધુ એક ગૌરવશાળી ક્ષણ નજીક આવી ગઈ છે. કેન્દ્ર સરકારના આવાસ અને શહેરી બાબતોના મંત્રાલય દ્વારા યોજાનારી પ્રતિષ્ઠિત 'સ્વચ્છ સર્વેક્ષણ 2025-26' એવોર્ડ સેરેમનીમાં ભાગ લેવા માટે અમદાવાદ મ્યુનિસિપલ કોર્પોરેશન (AMC) ના ઉચ્ચ પદાધિકારીઓ નવી દિલ્હી પહોંચી ગયા છે. દેશના રાષ્ટ્રપતિની વિશેષ ઉપસ્થિતિમાં યોજાનારા આ ભવ્ય રાષ્ટ્રીય સમારોહમાં અમદાવાદ શહેરને સ્વચ્છતા ક્ષેત્રે કરેલી ઉત્કૃષ્ટ કામગીરી બદલ ફરી એકવાર મોટું સન્માન મળવાની પૂરી શક્યતા સેવાઈ રહી છે.

ગત વર્ષના શાનદાર પ્રદર્શન બાદ ફરી વિજયપતાકા લહેરાવવાની આશા

નવી દિલ્હી ખાતે યોજાનારા આ રાષ્ટ્રીય કક્ષાના કાર્યક્રમમાં રાષ્ટ્રપતિના વરદ હસ્તે દેશના શ્રેષ્ઠ અને સ્વચ્છ શહેરોને એવોર્ડ એનાયત કરવામાં આવશે. આ મહત્વપૂર્ણ એવોર્ડ સેરેમનીમાં અમદાવાદનું પ્રતિનિધિત્વ કરવા અને સન્માન સ્વીકારવા માટે AMCના મેયર સહિતના મુખ્ય પદાધિકારીઓ અને ઉચ્ચ અધિકારીઓ દિલ્હી પહોંચી ચૂક્યા છે.

મ્યુનિસિપલ તંત્રમાં ભારે ઉત્સાહનો માહોલ 

 ઉલ્લેખનીય છે કે ગત વર્ષે પણ સ્વચ્છ સર્વેક્ષણમાં અમદાવાદ મ્યુનિસિપલ કોર્પોરેશને કચરાના સુચારુ નિકાલ, ડોર-ટુ-ડોર કલેક્શન અને જાહેર સ્વચ્છતાના માપદંડોમાં શાનદાર પ્રદર્શન કરીને પ્રતિષ્ઠિત એવોર્ડ હાંસલ કર્યો હતો. સતત બીજા વર્ષે પણ રાષ્ટ્રીય સ્તરે અમદાવાદની સ્વચ્છતાની નોંધ લેવાઈ રહી હોવાથી શહેરીજનો અને મ્યુનિસિપલ તંત્રમાં ભારે ઉત્સાહનો માહોલ જોવા મળી રહ્યો છે.

આ પણ વાંચો: Vadodara: આજવા રોડ પર 141 કરોડના ખર્ચે 300 બેડની અત્યાધુનિક SSG કાર્ડિયાક હોસ્પિટલનું નિર્માણ પૂર્ણતાના આરે, ફેબ્રુઆરી 2027માં થશે લોકાર્પણ