Ahmedabad: ટ્રાફિક જામની સમસ્યા ઉકેલવા AMC અને Google Mapsનો સ્માર્ટ પાયલોટ પ્રોજેક્ટ શરૂ

અમદાવાદમાં વાહનોની વધતી સંખ્યા અને તેના કારણે પીક અવર્સ (સવાર-સાંજ) દરમિયાન સર્જાતા ટ્રાફિક જામની સમસ્યાનો કાયમી ઉકેલ શોધવા માટે અમદાવાદ મહાનગરપાલિકા (AMC) એ ટેકનોલોજીનો સહારો લીધો છે. AMC ના સ્માર્ટ સિટી સેલ દ્વારા વૈશ્વિક ટેક કંપની ગુગલ (Google) ના સહયોગથી આર્ટિફિશિયલ ઇન્ટેલિજન્સ (AI) આધારિત ટ્રાફિક મેનેજમેન્ટ સિસ્ટમનો પાયલોટ પ્રોજેક્ટ સત્તાવાર રીતે લોન્ચ કરવામાં આવ્યો છે. આ પ્રોજેક્ટ આગામી દિવસોમાં અમદાવાદના વાહનચાલકોનો કિંમતી સમય અને ઇંધણ બચાવવામાં મહત્વનો સાબિત થશે.

કેમેરા વગર 'લાઇવ ડેટા' મોનિટરિંગ

સામાન્ય રીતે ટ્રાફિક પર નજર રાખવા માટે જંક્શનો પર સીસીટીવી કેમેરા અને સેન્સર્સ લગાવવા પડતા હોય છે, જે ખૂબ જ ખર્ચાળ પ્રક્રિયા છે. પરંતુ આ નવા પ્રોજેક્ટમાં કોઈ નવા કેમેરા લગાવ્યા વિના, ગુગલ મેપ્સ (Google Maps) નો ઉપયોગ કરતા વાહનચાલકોના લોકેશન અને સ્પીડના 'લાઇવ ડેટા' નો ઉપયોગ કરવામાં આવશે. AI સિસ્ટમ આ ડેટાનું ઓટોમેટિક વિશ્લેષણ કરશે. જેવો કોઈ રોડ કે ફ્લાયઓવર પર ટ્રાફિક જામ શરૂ થશે, કે તરત જ સિસ્ટમ કંટ્રોલ રૂમ અને સંબંધિત ટ્રાફિક એન્જિનિયરોને 'રિયલ ટાઇમ એલર્ટ' મોકલી દેશે, જેથી ટ્રાફિકને ડાયવર્ટ કરવા અથવા સિગ્નલ ટાઇમિંગ બદલવા જેવા ત્વરિત પગલાં લઈ શકાય.

એસ.જી. હાઇવે સહિતના વ્યસ્ત રૂટ્સ પર કામ શરૂ

પ્રાથમિક તબક્કે આ પાયલોટ પ્રોજેક્ટ હેઠળ શહેરના સૌથી વ્યસ્ત ગણાતા એસ.જી. હાઇવે (SG Highway), આશ્રમ રોડ, ૧૩૨ ફૂટ રિંગ રોડના અમુક હિસ્સા અને કી પોઇન્ટ્સ સમાન ફ્લાયઓવર્સને આવરી લેવામાં આવ્યા છે. આ વિસ્તારોમાં ટ્રાફિક કઈ દિશામાંથી વધુ આવે છે અને બોટલનેક (જ્યાં ટ્રાફિક અટકે છે) ક્યાં સર્જાય છે તેનો આખો રિપોર્ટ AI દ્વારા તૈયાર કરાશે. આ ડેટાના આધારે ભવિષ્યમાં રોડ કટીંગ, ફ્લાયઓવરની ડિઝાઇન અને નવા સિગ્નલો મૂકવાનું આયોજન થશે. અમદાવાદ આ પ્રોજેક્ટ સાથે દેશના અગ્રેસર 'સ્માર્ટ મોબિલિટી સિટી' ની યાદીમાં સામેલ થવા તરફ મજબૂત કદમ વધારી રહ્યું છે.
આ પણ વાંચો: Rajkot: કૂતરાઓના ખસીકરણ પાછળ 1.2 કરોડ ખર્ચી નાખ્યા, છતાં શહેરમાં શ્વાનનો આતંક યથાવત