Ahmedabadમાં SP રીંગ રોડ પર સર્જાયો ગમખ્વાર અકસ્માત, ડમ્પરની ટક્કર બાદ ટુ-વ્હીલર ચાલકનું કરૂણ મોત

અમદાવાદના વ્યસ્ત SP રીંગ રોડ પર એક અત્યંત ગમખ્વાર અકસ્માતની ઘટના સામે આવી છે. જેમાં ડમ્પર અને ટુ-વ્હીલર વચ્ચેની ટક્કર બાદ ભીષણ આગ લાગતા ટુ-વ્હીલર ચાલકનું ઘટનાસ્થળે જ કરૂણ મોત નીપજ્યું હતું. SP રીંગ રોડ પર પૂરપાટ ઝડપે આવી રહેલા એક ડમ્પર ચાલકે ટુ-વ્હીલરને જોરદાર રીતે અડફેટે લીધું હતું. આ ગંભીર ટક્કરના કારણે ટુ-વ્હીલર રોડ પર પટકાયું હતું અને ગમખ્વાર અકસ્માત બાદ તરત જ બંને વાહનોમાં આગ લાગી ગઈ હતી.

ડમ્પર ચાલકે ટૂ-વ્હીલરને અડફેટે લેતા લાગી આગ

આગ એટલી વિકરાળ હતી કે ટુ-વ્હીલર ચાલકને બચવાનો કોઈ મોકો મળ્યો ન હતો અને તે ઘટનાસ્થળે જ આગની લપેટમાં આવી જતાં તેનું મૃત્યુ થયું હતું. આગના કારણે ડમ્પર પણ બળીને ખાખ થઈ ગયું હતું. અકસ્માત અને આગની ઘટનાને પગલે SP રીંગ રોડ પર ભારે ટ્રાફિક જામ સર્જાયો હતો. ઘટનાની જાણ થતાં જ ટ્રાફિક પોલીસની ટીમ તાત્કાલિક સ્થળ પર દોડી આવી હતી. પરંતુ ત્યાં સુધીમાં જાનહાનિ થઈ ચૂકી હતી.

આગ લાગતા ટૂ-વ્હીલર ચાલકનું ઘટનાસ્થળે મોત

ટ્રાફિક પોલીસે મૃતક ટુ-વ્હીલર ચાલકની ઓળખ કરવા અને અકસ્માત માટે જવાબદાર ડમ્પર ચાલક વિરુદ્ધ કાયદેસરની કાર્યવાહી હાથ ધરવા માટે વધુ તપાસ શરૂ કરી છે. ડમ્પર ચાલક અકસ્માત બાદ સ્થળ પરથી ફરાર થઈ ગયો હોવાની આશંકા છે. આ ગમખ્વાર અકસ્માતે ફરી એકવાર ભારે વાહનોના બેફામ ડ્રાઇવિંગ સામે સવાલો ઊભા કર્યા છે.