મેક ઇન ઇન્ડિયાને વેગ: PM મોદીએ સાણંદમાં દેશના ત્રીજા 'CG Semi' સેમિકન્ડક્ટર પ્લાન્ટનું કર્યું ઉદ્ઘાટન

ભારતને વૈશ્વિક ટેકનોલોજી મેન્યુફેક્ચરિંગ હબ બનાવવાની દિશામાં દેશે એક વધુ મોટી સિદ્ધિ હાસિલ કરી છે. વડાપ્રધાન નરેન્દ્ર મોદીએ શનિવારના રોજ ગુજરાતના સાણંદ ખાતે 'CG Semi' ના આઉટસોર્સ્ડ સેમિકન્ડક્ટર એસેમ્બલી એન્ડ ટેસ્ટ પ્લાન્ટનું ભવ્ય ઉદ્ઘાટન કર્યું છે. આ સાથે જ ભારતમાં ત્રીજા સેમિકન્ડક્ટર ઉત્પાદન પ્લાન્ટની સત્તાવાર શરૂઆત થઈ ગઈ છે, જે દેશમાં ચિપ ઉત્પાદનની આત્મનિર્ભરતા માટે એક ઐતિહાસિક સીમાચિહ્ન સાબિત થશે.

આયાતી ચિપ્સ પરની નિર્ભરતા ઘટશે

આ નવો અત્યાધુનિક સેમિકન્ડક્ટર પ્લાન્ટ ભારતની સ્થાનિક ઉત્પાદન ક્ષમતામાં મોટો વધારો કરશે. આ પ્લાન્ટથી દેશની ઇલેક્ટ્રોનિક્સ સપ્લાય ચેઈન વધુ સુદ્રઢ બનશે. વિદેશથી આયાત કરવામાં આવતી મોંઘી ચિપ્સ પર ભારતની નિર્ભરતામાં મોટો ઘટાડો થશે. કેન્દ્ર સરકાર દેશને વૈશ્વિક સેમિકન્ડક્ટર માર્કેટના મુખ્ય કેન્દ્ર તરીકે સ્થાપિત કરવા માટે સતત પ્રયત્નશીલ છે અને આ લોકાર્પણ તે જ દિશામાં લેવાયેલું એક મજબૂત પગલું છે.

PM મોદીના નેતૃત્વમાં સેક્ટરની ઝડપી પ્રગતિ

આ પ્રસંગે કેન્દ્રીય ઇલેક્ટ્રોનિક્સ અને આઇટી મંત્રી અશ્વિની વૈષ્ણવે જણાવ્યું હતું કે, આ ઉદ્ઘાટન ભારતની સેમિકન્ડક્ટર યાત્રામાં એક મહત્વપૂર્ણ વળાંક છે. વડાપ્રધાન નરેન્દ્ર મોદીના મજબૂત નેતૃત્વ હેઠળ છેલ્લા કેટલાક સમયથી આ સેક્ટર દેશની રાષ્ટ્રીય પ્રાથમિકતા બની ગયું છે અને તેમાં અભૂતોપૂર્વ ગતિ જોવા મળી રહી છે.

તેમણે સેમિકન્ડક્ટર ક્ષેત્રે થયેલી આશ્ચર્યજનક પ્રગતિના આંકડા આપતા ઉમેર્યું કે, 28 ફેબ્રુઆરીએ સાણંદમાં પ્રથમ સેમિકન્ડક્ટર પ્લાન્ટ શરૂ થયો. 31 માર્ચે બીજા પ્લાન્ટનું કામ આગળ વધ્યું, અને હવે આ ત્રીજો 'CG Semi' પ્લાન્ટ પણ દેશને સમર્પિત કરી દેવામાં આવ્યો છે.

બુલેટ ટ્રેન પ્રોજેક્ટનું પણ મોટું અપડેટ

સેમિકન્ડક્ટર પ્લાન્ટના લોકાર્પણ સિવાય કેન્દ્રીય મંત્રી અશ્વિની વૈષ્ણવે મુંબઈ-અમદાવાદ હાઈ-સ્પીડ રેલ (બુલેટ ટ્રેન) કોરિડોર અંગે પણ એક મહત્વની જાહેરાત કરી હતી. બુલેટ ટ્રેન પ્રોજેક્ટનું કામ લગભગ 80 ટકા જેટલું પૂર્ણ થઈ ગયું છે. વળી, સૂરત અને બિલીમોરા વચ્ચેનો પ્રથમ ઓપરેશનલ સ્ટ્રેચ વર્ષ 2027 સુધીમાં શરૂ થવાની અપેક્ષા છે.

આ પણ વાંચો - Gujarat Rain Update: રાજ્યમાં બપોરે 04 વાગ્યા સુધીમાં 105 તાલુકામાં મેઘમહેર, જાણો તમારા તાલુકામાં કેટલો વરસાદ?