દેવભૂમિ દ્વારકામાં જિલ્લા ફેરબદલીની પ્રક્રિયા હાથ ધરાઈ, 31 શિક્ષકોને બદલીના ઓર્ડર અપાયા

દેવભૂમિ દ્વારકા જિલ્લામાં વધુ એક વખત પ્રાથમિક શિક્ષિકોની જિલ્લા ફેર ફેરબદલી કરવાની પ્રક્રિયા હાથ ધરાઈ છે. આજે વધુ 31 શિક્ષકોને DEPO દ્વારા બદલીના ઓર્ડરો આપીને છુટા કરવામાં આવ્યા છે. શિક્ષણ વિભાગ દ્વારા 31 શિક્ષકને છુટા કરાતા જિલ્લામાં 1,280 શિક્ષકોની ઘટ વર્તાઈ રહી છે. જિલ્લામાં 3,134ની મહેકમ સામે 1280 શિક્ષકોની ઘટ થતાં 40 ટકા જેટલા શિક્ષકો વગર સ્કુલો ધમધમશે. ત્યારે જિલ્લા ફેરબદલી મળતા શિક્ષકોમાં પણ ખુશી જોવા મળી હતી. જિલ્લા ફેર બદલીના નિયમો બદલ શિક્ષકો દ્વારા સરકારની પ્રસંશા પણ કરાઈ હતી.કચ્છમાં બદલીની માગ સાથે શિક્ષકોમાં ભારે રોષ ઉલ્લેખનીય છે કે થોડા દિવસ પહેલા જ કચ્છમાં બદલીની માગ સાથે શિક્ષકોમાં ભારે રોષ જોવા મળ્યો હતો. જિલ્લા શિક્ષણ વિભાગના ઠરાવ સામે વિરોધ નોંધાવ્યો હતો. શિક્ષકોને હાલ પૂરતા છુટા ન કરવા માટે ઠરાવ કર્યો હતો. ત્યારે જિલ્લા ફેરબદલી થયેલા શિક્ષકો જિલ્લા પંચાયત પહોંચ્યા હતા અને બદલી થયેલા શિક્ષકોને છુટા કરવામાં આવે તેવી માગ કરી હતી. તાજેતરમાં જ જિલ્લા ફેરબદલી કેમ્પમાં શિક્ષકોની બદલી કરવામાં આવી હતી. કચ્છના 10 તાલુકામાં શિક્ષકોની ઘટ તમને જણાવી દઈએ રાજ્યમાં સૌથી વધારે શિક્ષકોની ઘટ કચ્છ જિલ્લામાં જોવા મળી રહી છે. જિલ્લામાં પ્રાથમિક શાળામાં 2,965 જેટલા શિક્ષકોની ઘટ હતી, તેવામાં હવે બદલી કેમ્પમાં 1,364 શિક્ષકના જિલ્લા ફેર બદલીના ઓર્ડર થયા છે. જેના જિલ્લામાં 4000 જેટલા શિક્ષકોની ઘટ સર્જાશે. આમ પણ પહેલાથી જ શિક્ષકોની ઘટ હતી, તેવામાં જિલ્લા ફેરબદલીના કારણે શિક્ષકોની ઘટમાં વધારો થશે. જિલ્લામાં શિક્ષકોની ઘટના કારણે શિક્ષણની હાલત કથળી છે. કચ્છના 10 તાલુકામાં શિક્ષકોની ઘટ સતાવી રહી છે. અંતરિયાળ અને છેવાડાના ગામડામાં શિક્ષકની લાંબા સમયથી ઘટ છે જેના કારણે શિક્ષણ કથળી રહ્યું છે.