Weather News : ગુજરાતમાં આજે એક સાથે 4 વરસાદી સિસ્ટમ સક્રિય, દક્ષિણ ગુજરાતમાં અત્યંત ભારે વરસાદને લઈ રેડ એલર્ટ અપાયું

રાજ્યમાં આજે સાર્વત્રિક ભારે વરસાદની આગાહી હવામાન વિભાગ દ્વારા કરવામાં આવી છે, દક્ષિણ ગુજરાતમાં અત્યંત ભારે વરસાદને લઈ રેડ એલર્ટ આપવામાં આવ્યું છે. લો પ્રેશર સિસ્ટમ, સાયક્લોનિક સર્ક્યુલેશન, અપર એરસાયક્લોનિક સર્ક્યુલેશન અને મોન્સૂન ટ્રફ લાઇન હાલ સક્રિય હોવાથી ભારે વરસાદની આગાહી કરવામાં આવી છે.

જાણો આજે કયાં પડી શકે છે ભારે વરસાદ

હવામાન વિભાગની આગાહી પ્રમાણે વાત કરીએ તો ડાંગ, નવસારી, વલસાડમાં અતિભારે વરસાદની આગાહી કરવામાં આવી છે, છોટાઉદેપુર, નર્મદા, ભરૂચ, સુરત, તાપી, અમરેલી, ભાવનગરમાં વરસાદનું ઓરેન્જ એલર્ટ આપવામાં આવ્યું છે, બનાસકાંઠા,પાટણ, અરવલ્લી, મહેસાણા, સાબરકાંઠા, ખેડા, પંચમહાલ, દાહોદ, વડોદરા, અમદાવાદ, ગાંધીનગરમાં ભારે વરસાદનું યલો એલર્ટ આપવામાં આવ્યું છે.

ગુજરાતમાં છેલ્લા 24 કલાકમાં 195 તાલુકામાં વરસાદ

ગુજરાતમાં છેલ્લા 24 કલાકમાં 195 તાલુકામાં વરસાદ નોંધાયો છે, સૌથી વધુ ઉમરપાડામાં 8.11 ઇંચ વરસાદ, જાંબુઘોડામાં 6.22 ઇંચ, ભરુચમાં 5.39 ઇંચ વરસાદ, જેતપુર પાવીમાં 5.35 ઇંચ, નેત્રંગમાં 5.24 ઇંચ વરસાદ, અંકલેશ્વરમાં 4.96 ઇંચ, સોનગઢમાં 4.84 ઇંચ વરસાદ, ગરુડેશ્વરમાં 4.25 ઇંચ, બોડેલીમાં 4.09 ઇંચ વરસાદ, ધોલેરામાં 3.54 ઇંચ, વ્યારામાં 3.54 ઇંચ વરસાદ, સિંગવડમાં 3.5 ઇંચ, માંગરોળમાં 3.5 ઇંચ વરસાદ, ક્વાંટમાં 3.46 ઇંચ, સાગબારામાં 3.31 ઇંચ વરસાદ, ઝઘડિયામાં 3.31 ઇંચ, ખંભાતમાં 3.27 ઇંચ વરસાદ નોંધાયો છે. ગુજરાતમાં સરેરાશ 92 ટકાથી વધુ વરસાદ નોંધાયો, ઉત્તર ગુજરાતમાં 96 ટકાથી વધુ વરસાદ નોંધાયો

રાજ્યમાં અત્યારસુધીમાં સરેરાશ ૯૨ ટકાથી વધુ વરસાદ નોંધાયો હોવાની વાત સામે આવી છે, જ્યારે ઉત્તર ગુજરાતમાં ૯૬ ટકાથી વધુ વરસાદ નોંધાયો છે, સાર્વત્રિક વરસાદના પરિણામે રાજ્યના ૧૧૩ ડેમ હાઈએલર્ટ પર છે. રાજ્યના ૮૨ ડેમ ૧૦૦ ટકાથી વધુ જ્યારે ૬૮ ડેમ ૭૦ થી ૧૦૦ ટકા વચ્ચે ભરાયા છે, રાજ્યની જીવાદોરી સમાન સરદાર સરોવર ડેમમાં ૮૯ ટકાથી વધુ જળસંગ્રહ થયો છે, ગુજરાતમાં ચાલુ વર્ષે મેઘરાજાએ તમામ વિસ્તારમાં મેઘમહેર કરી છે. ચોમાસું સિઝનમાં સાર્વત્રિક વરસાદના પરિણામે તા. ૦૪ સપ્ટેમ્બર ૨૦૨૫ની સ્થિતિએ સરેરાશ ૯૨.૬૪ ટકા વરસાદ નોંધાયો છે. સરદાર સરોવર ડેમમાં હાલમાં તેની કુલ ક્ષમતાના ૮૯ ટકાથી વધુ જળસંગ્રહ ઉપલબ્ધ છે

જેમાં સૌથી વધુ ઉત્તર ગુજરાતમાં ૯૬.૯૪ ટકા વરસાદ, દક્ષિણ ગુજરાતમાં ૯૬.૯૧ ટકા, પૂર્વ-મધ્યમાં ૯૩.૭૯ ટકા, કચ્છમાં ૮૫.૧૪ ટકા જ્યારે સૌરાષ્ટ્રમાં ૮૪.૭૪ ટકા સરેરાશ વરસાદ નોંધાયો છે તેમ, સ્ટેટ ઇમરજન્સી ઓપરેશન સેન્ટર-SEOC, ગાંધીનગરની દ્વારા જણાવાયું છે. વધુમાં સાર્વત્રિક વરસાદના પરિણામે સરદાર સરોવર સિવાય રાજ્યના કુલ ૨૦૬ ડેમમાંથી ૧૧૩ ડેમ હાઈએલર્ટ પર મુકવામાં આવ્યા છે. જેમાં ૮૨ ડેમ ૧૦૦ ટકા, ૬૮ ડેમ ૭૦ થી ૧૦૦ ટકા વચ્ચે, ૨૪ ડેમ ૫૦ થી ૭૦ ટકા વચ્ચે જ્યારે ૧૭ ડેમ ૨૫ થી ૫૦ ટકા વચ્ચે ભરાયા છે. રાજ્યની જીવાદોરી સમાન સરદાર સરોવર ડેમમાં હાલમાં તેની કુલ ક્ષમતાના ૮૯ ટકાથી વધુ જળસંગ્રહ ઉપલબ્ધ છે.