Vav-Tharadમાં UGCના નવા નિયમો સામે વિરોધનો સૂર, કલેક્ટરને આવેદનપત્ર પાઠવી પુનર્વિચારની માંગ

બનાસકાંઠાના વાવ-થરાદ વિસ્તારમાં યુનિવર્સિટી ગ્રાન્ટ્સ કમિશન (UGC) દ્વારા જાહેર કરવામાં આવેલા નવા નિયમો સામે વિરોધનો સૂર ઊઠ્યો છે. UGC ના 'Promotion of Equity in Higher Education Institutions Regulations, 2026' ના અમલીકરણ અંગે સ્થાનિક અગ્રણીઓ અને વિદ્યાર્થીઓ દ્વારા જિલ્લા કલેક્ટરને આવેદનપત્ર પાઠવવામાં આવ્યું છે. આ આવેદનપત્ર મારફતે કેન્દ્ર સરકાર અને UGC સમક્ષ વિવાદાસ્પદ જોગવાઈઓ પર ત્વરિત પુનર્વિચાર કરવાની મજબૂત માંગ કરવામાં આવી છે, જેથી ઉચ્ચ શિક્ષણ ક્ષેત્રે સોહાર્દપૂર્ણ વાતાવરણ જળવાઈ રહે.

ભેદભાવ અને સામાજિક વિભાજન વધવાની ચિંતા

રજૂઆતકર્તાઓના જણાવ્યા અનુસાર, UGCના આ નવા નીતિ-નિયમો ઉચ્ચ શિક્ષણ સંસ્થાઓમાં સમાનતા લાવવાના બદલે વિદ્યાર્થીઓ વચ્ચે અસમાનતા, ભેદભાવ અને સામાજિક વિભાજન ઊભું કરે તેવી ભીતિ છે. વર્તમાન જોગવાઈઓથી વિદ્યાર્થી સમુદાયમાં તિરાડ પડી શકે છે અને શૈક્ષણિક વાતાવરણ પર તેની નકારાત્મક અસર પડી શકે છે. આથી વિદ્યાર્થીઓના સર્વાંગી હિતોનું રક્ષણ થાય તેમજ તમામ વર્ગના યુવાનોને સમાન ન્યાય અને તક પ્રાપ્ત થાય તે પ્રકારે કાયદાકીય સુધારા કરવાની જરૂરિયાત પર ભાર મૂકવામાં આવ્યો છે.

સમાનતા અને ન્યાયી પ્રક્રિયા સુનિશ્ચિત કરવા સરકારને અપીલ

વાવ-થરાદમાં આપવામાં આવેલા આ આવેદનપત્ર દ્વારા રાજ્ય અને કેન્દ્ર સરકાર સુધી શિક્ષણાર્થીઓની વ્યાજબી ચિંતા પહોંચાડવાનો પ્રયાસ કરાયો છે. આગામી સમયમાં શિક્ષણ ક્ષેત્રે કોઈ પણ પ્રકારનું સામાજિક વૈમનસ્ય ન ફેલાય અને બંધારણીય સમાનતા, ન્યાય તથા પારદર્શિતા જળવાઈ રહે તે માટે સરકાર તથા UGC યોગ્ય પગલાં ભરે તેવી અપીલ કરવામાં આવી છે. જો આ વિવાદાસ્પદ મુદ્દાઓ અંગે વહેલી તકે યોગ્ય નિર્ણય લેવામાં નહીં આવે તો આગામી દિવસોમાં આ વિરોધ વધુ તીવ્ર બનવાના એંધાણ દેખાઈ રહ્યા છે.

આ પણ વાંચો : Kutch News : ગાંધીધામથી ભુજ તરફ 1,000 લોકોની પગપાળા કૂચ, 55 દિવસના આંદોલન બાદ રસ્તા પર ઉતર્યા