Vav-Tharadના સુઇગામમાં સસ્તા અનાજની દુકાનદારનો ઓછું રાશન આપતો વીડિયો થયો વાયરલ

બનાસકાંઠા જિલ્લાના વાવ-થરાદ પંથકમાં આવેલા સુઇગામ તાલુકામાંથી સસ્તા અનાજની દુકાનનો એક ચોંકાવનારો વીડિયો સામે આવ્યો છે. સરકારી યોજના હેઠળ મળતા સસ્તા અનાજના વિતરણ દરમિયાન દુકાનદાર લાભાર્થીઓને નિયત જથ્થા કરતા ઓછું રાશન આપતો હોવાના ગંભીર આક્ષેપો સાથેનો વીડિયો સોશિયલ મીડિયા પર વાયરલ થયો છે. ગરીબ અને જરૂરિયાતમંદ લાભાર્થીઓના હક પર સીધી તરાપ મારવામાં આવી રહી હોવાનો આક્ષેપ સ્થાનિકો દ્વારા કરવામાં આવ્યો છે.

સોશિયલ મીડિયામાં વીડિયો વાયરલ થતાં લોકોમાં રોષ

સસ્તા અનાજની દુકાનદારની આ ગેરરીતિનો વીડિયો સોશિયલ મીડિયામાં વાયરલ થતાં જ સમગ્ર તાલુકામાં ભારે ખળભળાટ મચી ગયો છે. સામાન્ય નાગરિકો અને લાભાર્થીઓમાં દુકાનદારની આ પ્રકારની દાદાગીરી અને છેતરપિંડી સામે ભારે રોષ અને આક્રોશ વ્યાપી ગયો છે. સરકારી સહાયથી વંચિત રાખવાના આ પ્રયાસ સામે સ્થાનિક લોકોમાં ભારે નારાજગી જોવા મળી રહી છે.

જિલ્લા પુરવઠા અધિકારી સમક્ષ તાત્કાલિક કાર્યવાહીની માંગ

આ સમગ્ર મામલે લોકોમાં આક્રોશ ફેલાતાં જાગૃત નાગરિકો દ્વારા જિલ્લા પુરવઠા અધિકારી સમક્ષ રજૂઆત કરી તાત્કાલિક ધોરણે તપાસ હાથ ધરવાની માંગ કરવામાં આવી છે. ગરીબોના રાશનમાં કાપ મૂકનાર જવાબદાર દુકાનદાર સામે આકરાં પગલાં ભરવામાં આવે અને તેનો પરવાનો રદ કરી દાખલારૂપ કાર્યવાહી કરવામાં આવે તેવી લોકમાંગ ઊઠી છે.

ગુજરાતના વધુ સમાચાર વાંચવા માટે ક્લિક કરો