Vadodaraમાં ટ્રાફિકની સમસ્યાથી શહેરીજનો પરેશાન, ચારેય તરફ ટ્રાફિકની ગંભીર સમસ્યાથી હાલાકી

ગુજરાતની સંસ્કારી નગરી તરીકે ઓળખાતા વડોદરા શહેરમાં હાલ ટ્રાફિકની સમસ્યા એટલી હદે વણસી ગઈ છે કે નાગરિકો માટે ઘરની બહાર નીકળવું પણ મુશ્કેલ બની ગયું છે. શહેરના ચારેય મુખ્ય માર્ગો અને ચાર રસ્તાઓ પર સવાર-સાંજ પીક અવર્સ દરમિયાન વાહનોની લાંબી કતારો જોવા મળે છે. શહેરની ચારેય તરફ ફેલાયેલી આ ટ્રાફિકની ગંભીર સમસ્યા નાગરિકો માટે રોજિંદી માનસિક તાણ અને સમયનો બગાડ બની ગઈ છે. વાહનોની અવિરત આવનજાવ અને રોડ પર થતા અનિયમિત પાર્કિંગના કારણે એમ્બ્યુલન્સ જેવા ઇમરજન્સી વાહનો પણ ટ્રાફિકમાં ફસાઈ જતા હોવાના અહેવાલો સતત સામે આવી રહ્યા છે.

પબ્લિક ટ્રાન્સપોર્ટના ઉપયોગ પર ભાર

શહેરીજનો અને ટ્રાફિક નિષ્ણાતોનું માનવું છે કે આ સમસ્યા પાછળનું મુખ્ય કારણ શહેરમાં વાહનોની સંખ્યામાં અપ્રતિમ વધારો છે. "દર વર્ષે હજારો નવા વાહનો રસ્તા પર દોડતા થાય છે, પરંતુ તેની સામે રસ્તાઓની ભૌતિક સ્થિતિ અને પહોળાઈ એ જ રહે છે", જેના કારણે સિસ્ટમ પર ભાર વધી રહ્યો છે. આ પરિસ્થિતિમાંથી બહાર આવવા માટે હવે પ્રજા દ્વારા એવા સૂર ઉઠી રહ્યા છે કે સરકારે તાત્કાલિક ધોરણે પબ્લિક ટ્રાન્સપોર્ટ (જાહેર પરિવહન) ના ઉપયોગ માટે કડક નિયમો અને પ્રોત્સાહક નીતિઓ બનાવવી જોઈએ, જેથી પ્રાઇવેટ વાહનોનો વપરાશ ઘટી શકે.

પાલિકા અને પોલીસ વિભાગ દ્વારા નવા આયોજન કરવા વિનંતી...

આ ગંભીર સમસ્યાના ઉકેલ માટે વડોદરા મ્યુનિસિપલ કોર્પોરેશન (VMC) અને પોલીસ વિભાગ દ્વારા સંયુક્ત રીતે કોઈ નક્કર અને દૂરદર્શી આયોજન કરવામાં આવે તેવી પ્રબળ માંગ ઉઠી છે. માત્ર દંડ વસૂલવાથી ટ્રાફિક પ્રશ્ન હલ નહીં થાય, પરંતુ વૈજ્ઞાનિક અભિગમ અપનાવીને પાર્કિંગ ઝોન વિકસાવવા અનિવાર્ય છે. આ સાથે જ નાગરિકોએ પણ પોતાની જવાબદારી સમજીને યોગ્ય પાર્કિંગ અને 'સિવિક સેન્સ' (Civic Sense) નું પાલન કરવું પડશે, તો જ સંસ્કારી નગરીને ટ્રાફિક મુક્ત બનાવી શકાશે.

આ પણ વાંચો : Bomb Threat : રાજ્યભરની જેલોને બોમ્બથી ઉડાવવાની ધમકીથી સનસનાટી, જામનગર, વડોદરા અને મોરબીમાં પોલીસનું મેગા સર્ચ ઓપરેશન