Vadodaraની લિટલ ફ્લાવર સ્કૂલમાં વિદ્યાર્થીઓ વચ્ચે મારામારીની ઘટનાના પગલે વિવાદ વકર્યો

વડોદરાની જાણીતી લિટલ ફ્લાવર સ્કૂલમાં વિદ્યાર્થીઓને માર મારવાની ઘટનાના પગલે વિવાદ ઊભો થયો છે. આ મામલે નવાપુરા પોલીસ મથકમાં સામસામે બે અલગ-અલગ ફરિયાદો નોંધાઈ છે. એક જ પરિસરમાં આવેલી ત્રણ શાળાઓને કારણે આ ઘટના બની હોવાનું માનવામાં આવે છે. પહેલી ફરિયાદ મુજબ ધોરણ 11ના વિદ્યાર્થીઓએ ધોરણ 9ના વિદ્યાર્થીને માર માર્યો હતો. ધક્કામુક્કીની આ ઘટના બાદ આ ફરિયાદ નોંધાવવામાં આવી છે.

લિટલ ફ્લાવર સ્કૂલમાં વિદ્યાર્થીને માર માર્યો હતો

જ્યારે બીજી ફરિયાદમાં ધોરણ 9 અને ધોરણ 11ના વિદ્યાર્થીઓએ ભેગા મળીને ધોરણ 11ના એક અન્ય વિદ્યાર્થીને માર માર્યો હોવાનો આરોપ મૂકવામાં આવ્યો છે. આ મારામારીના બનાવમાં બંને પક્ષો દ્વારા નવાપુરા પોલીસ મથકમાં ફરિયાદો નોંધાવવામાં આવી છે. મહત્વની વાત એ છે કે આ બનાવમાં સંડોવાયેલા તમામ વિદ્યાર્થીઓ સગીર હોવાથી પોલીસે જુવેનાઈલ એક્ટ હેઠળ કલમો લગાવીને ફરિયાદ નોંધી છે. પોલીસે હવે બંને ફરિયાદોના આધારે તપાસ શરૂ કરી છે.

જુવેનાઈલ એક્ટ મુજબ નોંધાઇ ફરિયાદ

સ્કૂલ પરિસરમાં વિદ્યાર્થીઓ વચ્ચે મારામારીની આ ઘટનાએ શાળા પ્રશાસન અને વાલીઓમાં ચિંતા જગાવી છે. વિદ્યાર્થીઓના હિતો અને સુરક્ષાને ધ્યાનમાં રાખીને પોલીસ સમગ્ર મામલાની ઊંડાણપૂર્વક તપાસ કરી રહી છે. સગીર વયના વિદ્યાર્થીઓ વચ્ચે હિંસાની ઘટના કેમ બની અને તેના માટે કોણ જવાબદાર છે તે અંગે પોલીસ વધુ વિગતો મેળવવા પ્રયાસ કરી રહી છે.