Vadodara News: સગીરાનું અપહરણ કરી દુષ્કર્મ આચરનાર અને ખંડણી માંગનાર અજમેરનો સલીમ સૈલાબ ઝડપાયો

વડોદરામાંથી સગીરાના અપહરણની એક અત્યંત ચોંકાવનારી ગુનાહિત ઘટના પ્રકાશમાં આવી છે. મૂળ રાજસ્થાનની એક સગીરાનું વડોદરામાંથી વિધર્મી યુવાન દ્વારા બળજબરીપૂર્વક અપહરણ કરવામાં આવ્યું હતું. મૂળ રાજસ્થાનના અજમેરના રહેવાસી એવા આરોપી સલીમ ઉર્ફે સૈયદ સૈલાબ નામના આ શખ્સે સગીરાને પોતાની જાળમાં ફસાવી તેનું અપહરણ કર્યું હતું અને ત્યારબાદ ડરાવી-ધમકાવીને તેની સાથે અલગ-અલગ સ્થળો પર અનેકવાર દુષ્કર્મ આચર્યું હોવાનું સામે આવ્યું છે.

ઘરેણાં-મોબાઈલ વેચી માર્યા અને માગી ખંડણી

આ શાતિર આરોપીની ક્રૂરતા અહીં જ ન અટકી, તેણે સગીરાની પાસે રહેલા સોના-ચાંદીના કિંમતી દાગીના તેમજ તેનો મોબાઈલ ફોન પણ પડાવીને બજારમાં બારોબાર વેચી માર્યા હતા. આટલું જ નહીં, આરોપી સલીમે સગીરાની લાચાર માતાને ફોન કરીને દીકરીને સહીસલામત મુક્ત કરવાના બદલામાં રૂપિયા 1 લાખની મસમોટી ખંડણીની પણ માંગણી કરી હતી અને જો પૈસા ન મળે તો સગીરાને જાનથી મારી નાખવાની ધમકી આપીને પરિવારને ગર્ભિત આઘાત આપ્યો હતો.

અકોટા પોલીસ સ્ટેશનમાં ફરિયાદ બાદ સગીરા મુક્ત

આ ભયાનક પરિસ્થિતિ વચ્ચે સગીરાની માતાએ હિંમત દાખવીને વડોદરાના અકોટા પોલીસ સ્ટેશનમાં નરાધમ સલીમ સામે સત્તાવાર ફરિયાદ નોંધાવી હતી. ફરિયાદ મળતા જ એક્શનમાં આવેલી પોલીસે તાત્કાલિક અલગ-અલગ ટીમો બનાવીને ટેકનિકલ સોર્સની મદદથી સગીરાને વિધર્મીના ચુંગાલમાંથી હેમખેમ અને સુરક્ષિત રીતે છોડાવી લીધી છે. હાલ અકોટા પોલીસે નરાધમ આરોપી સલીમ સૈલાબ સામે અપહરણ, દુષ્કર્મ, ખંડણી અને પોક્સો એક્ટ હેઠળ ગુનો નોંધી તેને ઝડપી પાડવા માટેના ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો