Tharadમાં હાઈવે પર ભયાનક અકસ્માત, અસાસણ પાસે ડાયવર્ઝન પર પાર્ક કરેલી ટ્રક પાછળ બીજી ટ્રક ધડાકાભેર અથડાઈ...

વાવ-થરાદ પંથકમાં થરાદ-ડીસા હાઈવે પર અસાસણ ગામ નજીક એક ભયાનક અકસ્માતની ઘટના સામે આવી છે. હાલમાં આ માર્ગ પર ફોરલેન હાઈવે બનાવવાની કામગીરી ચાલી રહી છે. કામગીરી દરમિયાન યોગ્ય સુરક્ષા સંકેતો કે પૂરતી લાઇટિંગના અભાવ વચ્ચે ડાયવર્ઝન પર પાર્ક કરીને મૂકેલી એક ટ્રક પાછળ પૂરપાટ ઝડપે આવી રહેલી અન્ય એક ટ્રક ધડાકાભેર અથડાઈ હતી. આ અકસ્માતને પગલે માર્ગ પર થોડા સમય માટે વાહનવ્યવહાર ખોરવાયો હતો.

પંજાબથી કાતરવા પ્લાન્ટ જતી ટ્રક પલટી

મળતી માહિતી અનુસાર, અથડાયેલી ટ્રક પંજાબથી દાણ પાવડરનો મોટો જથ્થો ભરીને કાતરવા પ્લાન્ટ તરફ જઈ રહી હતી. ટક્કર એટલી પ્રચંડ અને જોરદાર હતી કે ટ્રકે રસ્તા પર જ પલટી મારી દીધી હતી. ટ્રક પલટી જતાં જ તેમાં ભરેલો દાણ પાવડરનો તમામ જથ્થો હાઈવે પર વેરવિખેર થઈ ગયો હતો. આ અકસ્માતમાં ટ્રકને ભારે આર્થિક નુકસાન પહોંચ્યું છે, પરંતુ સદનસીબે ચાલક કે અન્ય કોઈ વ્યક્તિને ગંભીર ઈજા ન પહોંચતાં મોટી જાનહાનિ ટળી હતી.

હાઈવે ઓથોરિટીની કાનૂની અને સુરક્ષા બેદરકારી સામે વાહનચાલકોમાં આક્રોશ

આ સમગ્ર દુર્ઘટનામાં ફોરલેન હાઈવેનું કામ કરી રહેલી એજન્સી અને હાઈવે પ્રશાસનની ઘોર બેદરકારી છતી થઈ છે. ડાયવર્ઝન પર યોગ્ય રેડિયમ સાઈનબોર્ડ, બેરિકેડ્સ કે સુચારુ સુરક્ષા વ્યવસ્થા ન હોવાથી અવારનવાર આવા અકસ્માતો સર્જાતા હોવાના આક્ષેપ વાહનચાલકો કરી રહ્યા છે. સ્થાનિકો અને વાહનચાલકોએ માગ કરી છે કે ડાયવર્ઝન પર તાત્કાલિક યોગ્ય લાઈટિંગ અને સેફ્ટી સાઈન મુકાય જેથી ભવિષ્યમાં મોટી હોનારત અટકાવી શકાય.

આ પણ વાંચો : Ahmedabad News : વર્ષોથી વતનની રાહ જોતા શરણાર્થીઓ માટે ખુશીના સમાચાર, 158 નાગરિકોને મળશે ભારતીય નાગરિકતાનું સન્માન