Tharad News: વાવ-થરાદમાં કોંગ્રેસનું શક્તિપ્રદર્શન, નવા વર્ષના સ્નેહમિલન સાથે 2027ની વિધાનસભા ચૂંટણીનો ફૂંક્યો શંખનાદ!

નવા વર્ષના પર્વ નિમિત્તે ઉત્તર ગુજરાતના રાજકારણમાં ગરમાવો જોવા મળ્યો છે. બનાસકાંઠાના વાવ-થરાદ પંથકમાં જિલ્લા કોંગ્રેસ દ્વારા થરાદ ખાતે એક નવા વર્ષના સ્નેહમિલન કાર્યક્રમનું આયોજન કરવામાં આવ્યું હતું. આ કાર્યક્રમ માત્ર શુભેચ્છા આદાનપ્રદાન પૂરતો સીમિત ન રહેતા આગામી ચૂંટણીઓની રણનીતિ માટેનું શક્તિપ્રદર્શન બની રહ્યો હતો. સ્નેહમિલનના બહાને કોંગ્રેસે આગામી રાજકીય સમીકરણો સાધવા માટે અત્યારથી જ કમર કસી લીધી છે.

દિગ્ગજ નેતાઓની ઉપસ્થિતિથી કાર્યકરોમાં ભારે ઉત્સાહ

આ મહત્વપૂર્ણ સ્નેહમિલન સમારોહમાં બનાસકાંઠાના સાંસદ ગેનીબેન ઠાકોર, જિલ્લા કોંગ્રેસ પ્રમુખ ગુલાબસિંહ રાજપૂત તેમજ પ્રદેશ મહામંત્રી આંબાભાઈ સોલંકી સહિતના અનેક દિગ્ગજ નેતાઓ, જિલ્લાના આગેવાનો અને મોટી સંખ્યામાં ઉત્સાહી કાર્યકરો ઉપસ્થિત રહ્યા હતા. દિગ્ગજ નેતાઓની ઉપસ્થિતિથી કોંગ્રેસના કાર્યકરોમાં ભારે જોમ અને ઉત્સાહ જોવા મળ્યો હતો.

મંચ પરથી 2027ની વિધાનસભા ચૂંટણીનો હુંકાર

સ્નેહમિલનના મંચ પરથી કોંગ્રેસના નેતાઓએ સ્પષ્ટ સંકેત આપ્યા હતા કે, પાર્ટી હવે 2027ની વિધાનસભા ચૂંટણીની તૈયારીઓમાં સક્રિય થઈ ગઈ છે. સાંસદ ગેનીબેન ઠાકોરે પોતાના સંબોધનમાં હુંકાર કરતા જણાવ્યું હતું કે, ગુજરાતમાં આગામી વિધાનસભા ચૂંટણી લડવા અને ભાજપને ટક્કર આપવા માટે કોંગ્રેસ સંપૂર્ણપણે તૈયાર છે. બીજી તરફ, જિલ્લા પ્રમુખ ગુલાબસિંહ રાજપૂતે વિશ્વાસ વ્યક્ત કરતા જણાવ્યું હતું કે, આગામી ચૂંટણીમાં વાવ-થરાદ જિલ્લાની ત્રણેય વિધાનસભા બેઠકો પર કોંગ્રેસ ભવ્ય વિજય મેળવશે.

સંગઠનને મજબૂત બનાવવા અને જનસંપર્ક પર ભાર

આ કાર્યક્રમનો મુખ્ય ઉદ્દેશ્ય નવા વર્ષની શુભેચ્છાઓ પાઠવવાની સાથે-સાથે પક્ષના સંગઠનને વધુ મજબૂત બનાવવાનો હતો. તૃણમૂલ સ્તરે કાર્યકરોને સક્રિય રાખીને જનસંપર્ક વધારવા પર વિશેષ ભાર મૂકવામાં આવ્યો હતો. આગામી સમયમાં ભાજપ સરકાર સામે લોકપ્રશ્નોને લઈને આક્રમક રણનીતિ અપનાવવાની ચર્ચા પણ આ મંચ પરથી કરવામાં આવી હતી, જેના કારણે રાજકીય માહોલ ગરમાયો છે.

આ પણ વાંચો: Vav-Tharadમાં પોલીસની ઐતિહાસિક કાર્યવાહી, ખોડા ચેકપોસ્ટ પરથી રૂ. 2.98 કરોડનો વિદેશી દારૂ ઝડપાયો