Tapi: ઉકાઇ ડેમ ભયજનક સપાટીએ, તાપી નદીમાં પાણી છોડાતા કાંઠાના ગામોને એલર્ટ કરાયા

ગુજરાતમાં કમોસમી વરસાદે જ્યાં એક તરફ ખેડૂતોને ચિંતામાં મૂક્યા છે, ત્યાં બીજી તરફ ઉપરવાસમાં થયેલા ભારે વરસાદને કારણે રાજ્યના જળાશયોમાં પાણીની આવક પણ ચિંતાજનક રીતે વધી છે. તાપી જિલ્લામાં આવેલો ઉકાઇ ડેમ તેની ભયજનક સપાટી નજીક પહોંચી જતાં તંત્ર દ્વારા સાવચેતીના પગલાં લેવામાં આવ્યા છે.

તાપીમાં ઉકાઇ ડેમના દરવાજા ખોલાયા 

હાલમાં ઉકાઇ ડેમની સપાટી 345.02 ફૂટ પર પહોંચી ગઈ છે, જે ભયજનક સ્તરની એકદમ નજીક છે. ઉપરવાસમાંથી ડેમમાં 46,418 ક્યુસેક પાણીની આવક થઈ રહી છે. પાણીની સતત વધતી આવકને નિયંત્રિત કરવા માટે અને ડેમની સુરક્ષા જાળવવા માટે તંત્રએ મહત્વનો નિર્ણય લીધો છે. ઉકાઇ ડેમના કુલ ત્રણ દરવાજાઓને 4 ફૂટ સુધી ખોલવામાં આવ્યા છે અને આવક જેટલું જ એટલે કે 46,418 ક્યુસેક પાણી તાપી નદીમાં છોડવામાં આવી રહ્યું છે. ડેમમાંથી પાણી છોડવામાં આવતાં તાપી નદીના જળસ્તરમાં વધારો થયો છે.

ઉકાઇ ડેમની સપાટી 345.02 ફૂટ પર પહોંચી

આ સંજોગોને ધ્યાનમાં રાખીને, તાપી નદીના કાંઠા વિસ્તારમાં આવેલા તમામ ગામોને સાવચેતીના ભાગરૂપે એલર્ટ કરવામાં આવ્યા છે. વહીવટી તંત્ર દ્વારા લોકોને નદીના પટમાં અવરજવર ન કરવા અને સુરક્ષિત સ્થળે રહેવા માટે સૂચના આપવામાં આવી છે. કમોસમી વરસાદના આ સમયગાળા દરમિયાન ડેમની સપાટી જાળવી રાખવા માટે તંત્ર સતત મોનીટરીંગ કરી રહ્યું છે, જેથી કોઈ અનિચ્છનીય બનાવ ન બને.