Surendranagar: જિલ્લામાં બાઈક ચોર ગેંગ સક્રિય થતા ફફડાટ

સુરેન્દ્રનગર જિલ્લામાં ફરી બાઈક ચોર ગેંગ સક્રિય થઈ હોય તેમ દસાડાના વાલેવડા અને થાનમાંથી બાઈક ચોરાયાની પોલીસ ફરિયાદ નોંધાઈ છે. બન્ને બનાવની ફરિયાદ નોંધી વધુ તપાસ પોલીસ ચલાવી રહી છે.

વાહન ચોરીના બંને બનાવની જે તે પોલીસ મથકના સુત્રો પાસેથી વધુમાં પ્રાપ્ત વિગતો મુજબ સુરેન્દ્રનગર જિલ્લામાં દસાડા તાલુકાના માનાવાડા ગામે રહેતા મહેશભાઈ ગેમરજી ઠાકોર ખેતીકામ કરે છે. ગત તા. 26-8ના રોજ તેઓ વાલેવડા ગામે રહેતા કૌટુંબીક કાકાના ઘરની બહાર બાઈક મુકીને રણુજા દર્શન કરવા ગયા હતા. ત્યારે ગત તા. 27-8ના રોજ રાત્રે કોઈ આ બાઈક ચોરી કરીને લઈ ગયુ હતુ. રણુજાથી આવ્યા બાદ મહેશભાઈએ તપાસ કરવા છતાં બાઈક ન મળી આવતા અંતે તેઓએ દસાડા પોલીસ મથકે અજાણ્યા શખ્સ સામે રૂપિયા 30 હજારનું બાઈક ચોરી કરી લઈ ગયાની ફરિયાદ નોંધાવી છે. બનાવની વધુ તપાસ બીટ જમાદાર એચ. કે. સોલંકી ચલાવી રહ્યા છે. જયારે થાનની ગ્રામલક્ષ્મી સોસાયટીમાં 64 વર્ષીય ઠાકરશીભાઈ ગાંડાભાઈ જાદવ રહે છે. ગત તા. 3-9ના રોજ તેમનો દિકરો બાળકો બાઈક લઈને મુકવા ગયો હતો. જયાંથી પરત આવીને ઘર પાસે બાઈક મુકયુ હતુ. 2 કલાક બાદ જોતા આ બાઈક નજરે પડયુ ન હતુ. આસપાસ શોધખોળ કરવા છતાં બાઈક ન મળી આવતા અંતે તેઓએ અજાણ્યા શખ્સ સામે થાન પોલીસ મથકે રૂપિયા 15 હજારનું બાઈક ચોરી કરી લઈ ગયાની ફરિયાદ નોંધાવી છે. બનાવની વધુ તપાસ થાન પોલીસ મથકના એચસી ડી.સી.લકુમ ચલાવી રહ્યા છે.