Surendranagar News : ડમ્પર અને સ્કૂલ વાન વચ્ચે અકસ્માત, 5 વિદ્યાર્થીઓ ગંભીર રીતે ઘાયલ

વઢવાણ શહેરના કોઠારિયા રોડ પર આજે સવારે એક ગમખ્વાર અકસ્માત સર્જાયો હતો. એક બેફામ ગતિએ આવતા ડમ્પરે સ્કૂલ વાનને જોરદાર ટક્કર મારતા, 5 થી વધુ વિદ્યાર્થીઓ ગંભીર રીતે ઘાયલ થયા હતા. આ ઘટનાને પગલે લોકોમાં ભયંકર રોષ વ્યાપ્યો છે. સવારે શાળાએ જતા વિદ્યાર્થીઓને લઈને પસાર થઈ રહેલી એક સ્કૂલ વાનને કોઠારિયા રોડ પર બેફામ ડમ્પર ચાલકે અડફેટે લીધી હતી. ટક્કર એટલી પ્રચંડ હતી કે સ્કૂલ વાનનો કચ્ચરઘાણ નીકળી ગયો હતો.

સ્થાનિકોની મદદથી વિદ્યાર્થીઓને બહાર કાઢવામાં આવ્યા

અકસ્માત સર્જાતા જ આસપાસના લોકો ઘટના સ્થળે દોડી આવ્યા હતા અને તાત્કાલિક રાહત તથા બચાવ કામગીરી શરૂ કરી હતી. સ્થાનિકોની મદદથી ઘાયલ વિદ્યાર્થીઓને વાનમાંથી બહાર કાઢી સારવાર અર્થે નજીકની હોસ્પિટલમાં ખસેડવામાં આવ્યા હતા. પ્રાપ્ત માહિતી મુજબ, ઘાયલ વિદ્યાર્થીઓમાંથી કેટલાકની હાલત ગંભીર હોવાથી તેમને વધુ સારવાર માટે રિફર કરવાની શક્યતા છે.

અકસ્માતને પગલે લોકોમાં ભારે રોષ

આ ઘટનાને પગલે લોકોમાં ભારે રોષ જોવા મળી રહ્યો છે. વાહનચાલકો દ્વારા ટ્રાફિક નિયમોના ઉલ્લંઘન અને ડમ્પર ચાલકોની બેફામ ગતિ સામે કડક કાર્યવાહી કરવાની માંગ કરી છે. સ્થાનિક પોલીસે ઘટના સ્થળે પહોંચી હતી અને આ મામલે વધુ તપાસ હાથ ધરી છે અને ડમ્પર ચાલક વિરુદ્ધ ગુનો નોંધી કાર્યવાહી શરૂ કરી છે.