Surendranagar News: ચોટીલામાં આરોગ્ય સાથે ચેડા! ડિગ્રી વગરનો બોગસ ડોક્ટર ઝડપાયો

સુરેન્દ્રનગર જિલ્લામાં લોકોના સ્વાસ્થ્ય સાથે ચેડાં કરતા ગેરકાયદે તબીબો સામે SOG પોલીસે લાલ આંખ કરી છે. સામાન્ય નાગરિકોના જીવ જોખમમાં મૂકીને મેડિકલ ક્ષેત્રે ચાલતા ગેરકાયદે ધંધાઓનો પર્દાફાશ કરવા માટે પોલીસ સતત સક્રિય છે. તાજેતરમાં જ ચોટીલા વિસ્તારમાંથી એક એવો જ ચોંકાવનારો કિસ્સો સામે આવ્યો છે, જ્યાં કોઈ પણ જાતની અધિકૃત ડિગ્રી વગર જ દર્દીઓની સારવાર કરનાર બોગસ ડોક્ટર પોલીસના સકંજામાં આવી ગયો છે.

ચોટીલામાં 'આદેશ મલ્ટીસ્પેશ્યાલીટી હોસ્પિટલ' પર દરોડો

સુરેન્દ્રનગર સ્પેશિયલ ઓપરેશન ગ્રૂપ પોલીસને બાતમી મળી હતી કે, ચોટીલા ખાતે આવેલી 'આદેશ મલ્ટીસ્પેશ્યાલીટી હોસ્પિટલ' માં કોઈ સત્તાવાર ડિગ્રી વગર જ દર્દીઓની સારવાર કરવામાં આવી રહી છે. આ માહિતીના આધારે પોલીસે બાતમીની ખરાઈ કરવા માટે એક ડમી દર્દીને હોસ્પિટલ ખાતે મોકલ્યો હતો. ડમી દર્દી મોકલીને સમગ્ર મામલાની ખાતરી કર્યા બાદ SOG પોલીસે હોસ્પિટલ પર રેડ પાડી હતી અને બોગસ ડોક્ટરને રંગેહાથ ઝડપી પાડ્યો હતો.

33 વર્ષીય વિશાલ સોરાણીની ધરપકડ અને ગેરકાયદે પ્રવૃત્તિ

પોલીસ તપાસમાં બહાર આવ્યું કે, પકડાયેલો ઇસમ 33 વર્ષીય વિશાલ વિઠ્ઠલભાઈ સોરાણી છે. આ શખ્સ પાસે તબીબી ક્ષેત્રની કોઈ પણ પ્રકારની માન્ય કે લીગલ મેડિકલ ડિગ્રી ન હોવા છતાં તે હોસ્પિટલમાં આવતા અજાણ અને ભોળા દર્દીઓને એલોપેથીક દવાઓ અને સારવાર આપતો હતો. લોકોના આરોગ્ય સાથે સીધા ખેલ કરનાર આ બોગસ ડોક્ટરની કાર્યોની પદ્ધતિ જોઈને પોલીસ પણ ચોંકી ઉઠી હતી.

પોલીસ દ્વારા ગુનો નોંધી કાયદેસરની કડક કાર્યવાહી

આ સમગ્ર મામલે SOG પોલીસની ટીમે આરોપી સામે કાયદેસરની ત્વરિત કાર્યવાહી હાથ ધરી છે. ચોટીલા પોલીસ સ્ટેશન ખાતે મેડિકલ પ્રેક્ટિશનર એક્ટ કલમ-30 મુજબ ગુનો નોંધીને આગળની વધુ તપાસ અને કાર્યવાહી હાથ ધરવામાં આવી છે. વગર ડિગ્રીએ લોકોના જીવન સાથે રમતા આવા તત્વો સામે પોલીસની આ કડક કાર્યવાહીથી બોગસ તબીબોમાં ભારે ફફડાટ ફેલાઈ ગયો છે.

આ પણ વાંચો: Surendranagarમાં બજાણા પોલીસે દૂધના ટેન્કરની આડમાં સરકાવાતો વિદેશી દારૂનો જથ્થો ઝડપ્યો