Surat: મોટા વરાછાની ઓશિયન એમટેક કંપનીએ આચરી 1.73 કરોડની છેતરપિંડી, રોકાણકારો રઝળ્યા

સુરતમાં અવારનવાર લોકોને ટૂંકા સમયમાં વધુ વ્યાજ કે બમણી રકમ આપવાની લાલચ આપી ઉઠમણું કરતી ટોળકીઓ સક્રિય થતી હોય છે. આવો જ એક મોટો આર્થિક ગુનો મોટા વરાછા વિસ્તારમાંથી સામે આવ્યો છે. અહીં આવેલા સિલ્વર ટ્રેડ સેન્ટરમાં શાતિર ઠગોએ ‘ઓશિયન એમટેક કંપની’ ના નામે એક ભવ્ય અને હાઇટેક ડિજિટલ ઓફિસ શરૂ કરી હતી. આ કંપનીના એજન્ટો અને પ્રોમોટરોએ વરાછા, કતારગામ અને આસપાસના રત્નકલાકારો અને વેપારીઓને જાળમાં ફસાવવાનું શરૂ કર્યું હતું.

અઢી વર્ષનું આયોજનબદ્ધ ષડયંત્ર

કંપની દ્વારા એવી લોભામણી જાહેરાતો અને સ્કીમો બજારમાં મુકાઈ હતી કે, જો કોઈ વ્યક્તિ આજે કંપનીમાં રોકાણ કરશે, તો તેને બરાબર અઢી વર્ષની અંદર લોકપ્રિય 'એક કા ડબલ' સ્કીમ હેઠળ બમણી રકમ પરત અપાશે. શરૂઆતમાં વિશ્વાસ જીતવા માટે રોકાણકારોને ડિજિટલ પ્લેટફોર્મ પર ખોટા નફાના ગ્રાફ અને કાગળ પર ગેરંટી બતાવવામાં આવી હતી. આ માયાવી જાળમાં ફસાઈને અસંખ્ય લોકોએ પોતાની કષ્ટની કમાણી આ કંપનીમાં ઇન્વેસ્ટ કરી દીધી હતી. જ્યારે રોકાણનો આંકડો ₹૧.૭૩ કરોડ પર પહોંચી ગયો અને લોકો પોતાની પાકતી મુદતના નાણાં પરત લેવા માટે ઓફિસે પહોંચ્યા, ત્યારે માલિકો ઓફિસને તાળા મારીને ફોન સ્વીચ ઓફ કરી ભાગી છૂટ્યા હોવાનું માલૂમ પડ્યું હતું.

ઉત્રાણ પોલીસે તપાસનો ધમધમાટ શરૂ કર્યો

કંપની બંધ હોવાનું જોઈને રોકાણકારોના પગ નીચેથી જમીન સરકી ગઈ હતી. છેતરાયાનો અહેસાસ થતાં જ મોટી સંખ્યામાં ભોગ બનનારાઓ ઉત્રાણ પોલીસ મથકે દોડી ગયા હતા. ઉત્રાણ પોલીસે આ મામલે કાયદેસરનો ગુનો નોંધીને તપાસના ચક્રો ગતિમાન કર્યા છે. પોલીસ આરોપીઓના લોકેશન મેળવવા માટે સાયબર સેલની મદદ લઈ રહી છે, તેમજ કંપની સાથે સંકળાયેલા તમામ ડિજિટલ એકાઉન્ટ્સ અને બેંક ખાતાઓની વિગતો મેળવી તેને સીઝ (Freeze) કરવાની તજવીજ હાથ ધરી છે, જેથી રોકાણકારોના નાણાં વસૂલ કરી શકાય.

આ પણ વાંચો: Surat: અમરોલીમાં યુવતીને લગ્નની લાલચ આપી 45 લાખની છેતરપિંડી, ન્યૂડ વીડિયોના નામે કરાતું બ્લેકમેઇલિંગ