Surat News: સોસાયટીના ગેટ પાસેની ડ્રેનેજ લાઈન તૂટતા ખાડો પડ્યો, બાંકડે બેઠેલા વૃદ્ધ ખાડામાં ખાબક્યા

રાજ્યમા મોટા શહેરોમાં ક્યાંક કામગીરીને કારણે ભૂવા પડવાની અનેક ઘટનાઓ સામે આવે છે. પરંતુ રહણાંક સોસાયટીઓમાં અચાનક ભૂવો પડવાની ઘટના સામે આવી છે. શહેરના વેલેન્જામાં આવેલી શ્યામ રેસિડેન્સીમાં એક વૃદ્ધ બાંકડે બેઠા હતાં અને અચાનક ત્યાંની ડ્રેનેજ લાઈનમાં ભંગાણ થતાં વૃદ્ધ અંદર ગરકાવ થઈ ગયા હતાં. ફાયર વિભાગના જવાનોએ વૃદ્ધને બહાર કાઢ્યા હતાં.

ફાયર વિભાગની ટીમે વૃદ્ધને સલામત રીતે બહાર કાઢ્યા

પ્રાપ્ત વિગતો પ્રમાણે સુરત શહેરના વેલેન્જા ખાતે સ્થિત શ્યામ રેસિડેન્સીમાં ગેટ પાસે મુકેલા બાંકડા પર એક વૃદ્ધ બેઠા હતાં. આ દરમિયાન અચાનક ડ્રેનેજ લાઈન તૂટી હતી ત્યાર બાદ ત્યાં ખાડો પડી ગયો હતો. જેમાં બાંકડે બેઠેલા વૃદ્ધ ખાબક્યા હતાં. ખાડામાં ફસાયેલા આ વૃદ્ધને બહાર કાઢવા માટે ફાયર બ્રિગેડને કોલ કરાયો હતો. જેથી ફાયરની ટીમ તાત્કાલિક ઘટના સ્થલે પહોંચી ગઈ હતી. ફાયર વિભાગની ટીમે વૃદ્ધને સલામત રીતે બહાર કાઢ્યા હતાં.

આ ઘટનાને કારણે સોસાયટીમાં રહેતા લોકોમાં રોષ ફેલાયો

વૃદ્ધને સદનસીબે કોઈ ગંભીર ઈજા પહોંચી નહોતી. આ ઘટનાને કારણે સોસાયટીમાં રહેતા લોકોમાં રોષ ફેલાયો હતો. લોકોએ ડેવલોપર સામે કાયદેસરની કાર્યવાહી કરવા માગ કરી હતી. સોસાયટીમાં બાંધકામની ગુણવત્તા પર સવાલો ઉઠાવી લોકોએ ડેવલોપર સામે કાર્યવાહી કરવા માગ કરી હતી. આ ઘટનામાં મોટી દુર્ઘટના સર્જાતા રહી ગઈ હતી. જેના કારણે લોકોએ રાહતનો શ્વાસ લીધો હતો.